Një investigim i gazetës izraelite “Haaretz” ka ngritur dyshime mbi lidhje të fshehta në fushën e mbrojtjes mes Izraelit dhe dy vendeve të Gjirit, Katarit dhe Arabisë Saudite.
Sipas medias izraelite, disa prej kompanive më të rëndësishme të industrisë ushtarake të Izraelit kanë marrë pjesë në furnizime me sisteme dhe pajisje të avancuara, pavarësisht mungesës së marrëdhënieve diplomatike zyrtare me këto vende.
Në qendër të investigimit përmenden Elbit Systems dhe Israel Aerospace Industries, të cilat, sipas dokumenteve dhe fotografive të analizuara nga “Haaretz”, janë përfshirë në projekte ushtarake me vlerë qindra miliona dollarë.
Një nga rastet më të rëndësishme lidhet me avionët VIP të familjes mbretërore të Katarit. Sipas investigimit, në tre prej këtyre avionëve është instaluar sistemi mbrojtës C-MUSIC, i prodhuar nga Elbit Systems.
Ky sistem përdoret për mbrojtjen e avionëve nga raketat që drejtohen me infra të kuqe. Ai identifikon kërcënimin dhe përdor rreze lazer për të devijuar raketën nga objektivi.
“Haaretz” shkruan se një nga avionët e pajisur me këtë teknologji është përdorur edhe nga Emiri i Katarit gjatë një vizite në Teheran vitin e kaluar.
Investigimi prek edhe programin amerikan të avionëve luftarakë F-15QA të Katarit. Sipas dokumenteve të cituara, kompani izraelite kanë qenë pjesë e zinxhirit të furnizimit si nënkontraktore, duke ofruar komponentë strukturorë, pajisje për avionët, syze të shikimit natën dhe helmeta të avancuara për pilotët.
Në material përmenden edhe helmetat JHMCS, të cilat i japin pilotit informacion fluturimi direkt në vizor dhe përdoren në avionë luftarakë modernë.
Sipas “Haaretz”, Katari ka blerë rreth 160 helmeta të tilla, me një vlerë të përllogaritur rreth 35 milionë dollarë.
Edhe Arabia Saudite përmendet në investigim përmes programit amerikan F-15SA. Sipas raportimit, në këtë program janë përfshirë qindra helmeta luftarake dhe pajisje të shikimit natën, të prodhuara nga kompani ku kanë pasur rol edhe ndërmarrje izraelite.
Rasti ngre pikëpyetje për mënyrën se si teknologjia ushtarake izraelite ka mbërritur në vende me të cilat Izraeli nuk ka marrëdhënie zyrtare diplomatike.
Sipas “Haaretz”, këto furnizime janë zhvilluar përmes projekteve ndërkombëtare dhe programeve amerikane të armatimit, ku kompanitë izraelite kanë vepruar si pjesë e zinxhirit të nënkontraktorëve.
Investigimi tregon se, pas fasadës së mungesës së marrëdhënieve diplomatike, bashkëpunimi në fushën e sigurisë dhe teknologjisë ushtarake mund të ketë qenë shumë më i thellë sesa është pranuar publikisht.
