Kryeministri Edi Rama prezantoi këtë të shtunë në ambientet e QSUNT ministren e re të Shëndetësisë, Evis Sala, duke i besuar asaj drejtimin e sektorit më delikat të qeverisjes. Rama vlerësoi figurën e saj akademike dhe përvojën si drejtuese në universitete ndërkombëtare, ndërsa shpalosi vizionin e tij për “Shëndetësinë 2030”.
Në fjalën e tij, kreu i qeverisë njoftoi se po planifikohet hapja e një universiteti të ri në Fier dhe një bashkëpunim strategjik me kompani të njohura të Inteligjencës Artificiale për të integruar teknologjinë në shërbimet shëndetësore.
Ndërkaq, ministrja e re Evis Sala theksoi sfidat që e presin në këtë mandat, duke vënë në qendër rimbursimin e barnave onkologjike, një nga shqetësimet më të mëdha të pacientëve me sëmundje të rënda. “Ky do të jetë një prioritet absolut, në mënyrë që pacientët të mos mbeten peng i kostove të larta të trajtimit,” u shpreh ajo.
E pranishme në ceremoninë e dorëzimit të detyrës ishte edhe ish-ministrja Albana Koçiu, e cila i dorëzoi stafetën pasardhëses, duke falënderuar mjekët dhe infermierët për punën dhe përkushtimin e tyre.
Me këtë ndryshim në drejtimin e Ministrisë së Shëndetësisë, qeveria synon jo vetëm modernizimin e sistemit, por edhe garantimin e aksesit më të gjerë dhe të drejtëpërdrejtë të pacientëve tek barnat jetike. /skyweb.al
