Drejtoria Rajonale e OSSH Fier ka shpallur tenderin me fond limit 104.2 milionë lekë për rikonstruksionin e rrjetit elektrik në nënstacionin Patos 35/6 kV.
Projekti përfshin 2 fidera, ndërtimin e 3 kabinave të reja, spostimin e 7 ekzistueseve dhe rikonstruksionin e 8 të tjerave. Ky investim synon përmirësimin e furnizimit dhe përballimin e ngarkesës së shtuar nga zhvillimi urban dhe rritja e numrit të abonentëve.
Në një procedurë të veçantë, do të investohen edhe 100 milionë lekë për rikonstruksionin e rrjetit elektrik në zonat rurale Drizë dhe Vadhizë, që mbulojnë një sipërfaqe prej 35 km² dhe rreth 400 abonentë.
Rrjeti aktual, i ndërtuar që në vitet ’70 dhe i përkeqësuar gjatë tranzicionit, do të zëvendësohet me një infrastrukturë të re që garanton furnizim të qëndrueshëm dhe të përshtatshëm për zhvillimet e ardhshme. /Skyweb.al
