Presidenti i Shteteve të Bashkuara, Donald Trump, ka deklaruar se sot do të bëjë një njoftim të rëndësishëm mbi autizmin, duke e cilësuar atë si një nga konferencat më të rëndësishme të jetës së tij politike.
Gjatë një fjalimi në ceremoninë përkujtimore të aktivistit konservator Charlie Kirk, Trump tha se administrata e tij ka bërë përparime të mëdha në trajtimin e çrregullimeve të spektrit autik dhe se “mendoj se kemi gjetur një kurë për autizmin”.
Ai shtoi se lajmi “do të duket i mahnitshëm” dhe se administrata nuk do të lejojë më që rritja e rasteve të autizmit të vazhdojë pa ndërhyrje.
Edhe pse presidenti nuk dha detaje specifike, raportimet në mediat amerikane sugjerojnë se njoftimi mund të përfshijë rekomandime për gratë shtatzëna, duke i këshilluar të shmangin përdorimin e medikamentit Tylenol, përveç rasteve kur kanë ethe, për shkak të dyshimeve mbi lidhjen e tij me rritjen e rasteve të autizmit.
Sipas “Washington Post”, autoritetet federale po shqyrtojnë gjithashtu promovimin e një ilaçi të quajtur leukovorin si trajtim të mundshëm për këtë çrregullim neurozhvillimor.
Iniciativa lidhet me një grup pune të drejtuar nga sekretari i Shëndetësisë, Robert F. Kennedy Jr., mbi shkaqet dhe mënyrat për të frenuar rritjen e shifrave të autizmit në SHBA.
Trump e përshkroi njoftimin e ardhshëm si një hap të madh në shëndetësi dhe premtoi se “do të jetë një nga lajmet më të mëdha që kam dhënë ndonjëherë”. /skyweb.al
