Montreali u bë këtë javë qendra e diskutimeve globale për të ardhmen e aviacionit, ku takimi i liderëve botërorë të sektorit nxori në pah sfida të reja dhe kritika të forta.
Delegacioni amerikan shprehu pakënaqësi për fokusin e madh tek tranzicioni i gjelbër, ndërkohë që në tryezë u shtuan shqetësimet për kërcënimet teknologjike, ndotjen e rritur nga fluturimet dhe mungesën e fuqisë punëtore.
Organizata Ndërkombëtare e Aviacionit Civil (ICAO) paralajmëroi se sistemi global, që aktualisht shërben për rreth 4.6 miliardë pasagjerë në vit, duhet të pësojë ndryshime të thella për të përballuar pothuajse trefishin e kësaj shifre deri në vitin 2050.
Por përveç kapaciteteve, industrisë i kërkohet edhe të reduktojë emetimet ndotëse, një objektiv që sipas Shoqatës Ndërkombëtare të Transportit Ajror (IATA), nuk do të përmbushet në afatin e vitit 2030, ku parashikohej ulja me 5% e tyre.
Ndërkohë, mungesa e fuqisë punëtore mbetet një nga shqetësimet më të mëdha.
Vetëm për pilotët, ICAO vlerëson se deri në vitin 2043 do të nevojiten 670 mijë të rinj.
India tashmë ka paralajmëruar për krizë në këtë sektor, duke kërkuar një kod sjelljeje për rekrutimet, ndërsa Brazili po përpiqet të përfshijë më shumë gra dhe pakica për të kompensuar mungesat në mekanikë dhe staf mbështetës.
Në anën tjetër, teknologjia po sjell lehtësira në funksionimin e aviacionit, por po hap edhe një front të ri rrezikshmërie.
Disa nga aeroportet kryesore të Europës u paralizuan kohët e fundit pas sulmeve kibernetike që rrëzuan sistemet e regjistrimit të pasagjerëve.
Projekcionet e ICAO tregojnë se trafiku global i pasagjerëve do të arrijë në 7.2 miliardë në vitin 2035, nga 4.6 miliardë që u regjistruan në 2024.
Kjo rritje pritet të sjellë fitime për ekonominë botërore, por edhe presion të madh mbi vendet dhe linjat ajrore për të garantuar siguri, qëndrueshmëri dhe staf të mjaftueshëm. /skyweb.al
