Në një takim me ministra dhe deputetë në selinë rozë, ku e pranishme ishte edhe kandidatja e socialistëve për bashkinë e Tiranës, Ogerta Manastirliu, kryeministri Edi Rama foli për çështjen e ujit në Tiranë.
“Duke nisur që nga uji i pijshëm që është një problem si asnjëherë më parë në këtë periudhë. Është një problem i keqadministrimit dhe ne do të ndërhyjmë përsëri në drejtimin e ujësjellësit të Tiranës”, tha Rama.
Shefi i Ekzekutivit u ndal edhe tek reforma territoriale, një nga elementët e programit të prezantuar për mandatin e katërt.
“Siç e kemi bërë me dije, një reformë e re më e thellë e gjithpërfshirëse për të gjithë territorin e Shqipërisë ka nisur të marrë jetë, duke u konceptuar paraprakisht, drejt krijimit të një operatori kombëtar që do të funksionojë njësoj si operatori kombëtar i shpërndarjes së energjisë elektrike.
Qeveria nuk do të qëndrojë më anash duke pritur që Bashkitë të kryejnë shërbimin e duhur për qytetarët, por do t’u bashkohet atyre dhe do të udhëheqë duke marrë të gjithë përgjegjësinë për ecurinë e gjithë këtij procesi”, tha mes të tjerash Rama. /sKYWEB.AL
