Kredia sovrane që konfirmon krizën e madhe në sektorin e shpërndarjes së energjisë elektrike

3 kompanitë e OSHEE grup po marrin 20 milion kredi nga një bankë tregtare, kredi e cila garantohet nga buxheti i shtetit dhe automatikisht kontabilizohet si borxh në regjistrin e borxhit.

Çfarë do të thotë kjo?

Kjo do të thotë që banka ka vlerësuar se financat e shoqërive në fushën e shpërndarjes së energjisë nuk janë aq të forta sa i takon aftësisë paguese dhe ka nevojë për një garantor që në këtë rast është buxheti i shtetit.

Paaftësia paguese për një ndërmarrje si OSHEE- e cila nuk ka probleme me likuiditetin dhe cash flown pasi ka nivel mbi 80% të arkëtimit, të bën të mendosh se vlera e detyrimeve është e lartë.

Por këtë nuk kemi si ta dimë, pasi jo vetëm që bilancet e audituara të vitit të fundit nuk janë depozituar, por opinioni i audituesit është me rezervë, pra të dhënat nuk janë të besueshme!

Në këtë rast, banka tregtare kërkon garanci më të madhe siç është ajo shtetërore, ku nëse shuma nuk paguhet do të merret nga buxheti i shtetit.

Kjo do të thotë që qytetarëve t’ia marrësh dy herë paratë për energjinë elektrike, njëherë përmes çmimit në faturë dhe njëherë nga taksat që derdhin.

Përveç kësaj, fakti që kredia nuk merret nga një institucion financiar ndërkombëtar me interes të butë, por nga një bankë tregtare, tregon se vlerësimet për shëndetin financiar të këtij sektori nga të huajt nuk janë ato që na thotë qeveria.

Dhe një gjë të fundit. Kosto e interesit që mban OSHEE për kapitalin në formulën e llogaritjes së çmimit të energjisë është 7.5%. Këtë e justifikon me faktin që bankat vlerësojnë risk të lartë për Shqipërinë, pavarësisht se norma e bonove të thesarit është dy herë më e ulët.

Tani që garantor është buxheti, duhet që interesi për këtë kredi dhe ato të tjera të garantuara nga shteti të ulet dhe kjo reflektohet në ulje të çmimit të energjisë elektrike. Ndryshe i bie të faturohemi dy herë për blerjen e të njëjtit mall. /skyweb.al