Ekonomia ka shënuar rritje, por shtylla kryesore mbetet sektori shtetëror. Të dhënat më të fundit nga INSTAT tregojnë se në tremujorin e dytë të vitit 2025, Produkti i Brendshëm Bruto (PBB) u rrit me 3.51% krahasuar me të njëjtën periudhë të vitit të kaluar. Megjithatë, një analizë më e thelluar e strukturës së kësaj rritjeje zbulon se pjesa më e madhe e kontributit vjen nga administrata publike, arsimi dhe shëndetësia, si rezultat i rritjes së pagave në sektorin shtetëror dhe zgjerimit të shpenzimeve qeveritare.
Paga mesatare bruto në sektorin publik ka shënuar një rritje të konsiderueshme, duke arritur në gati 100 mijë lekë në muaj, ndërsa konsumi i qeverisë është rritur me mbi 12%. Kjo tregon qartë se motori kryesor i rritjes ekonomike nuk është sektori privat, por ndërhyrja direkte e shtetit përmes rritjes së pagave dhe shpenzimeve sociale.
Ndërkohë, sektorë të rëndësishëm të ekonomisë si bujqësia dhe industria janë në rënie. Bujqësia, që tradicionalisht ka pasur një rol të rëndësishëm në punësim dhe furnizim të brendshëm, ka dhënë një kontribut negativ në PBB, ndërsa industria po ashtu ka shënuar ulje. Edhe pse ndërtimi dhe turizmi kanë sjellë një farë kontributi pozitiv, ai mbetet modest, larg potencialit që kanë këto sektorë për të gjeneruar rritje të qëndrueshme.
Kjo situatë ngre pikëpyetje mbi qëndrueshmërinë e rritjes ekonomike nëse ajo mbështetet kryesisht te financat publike. Ndërkohë që rritja e pagave në sektorin shtetëror mund të sjellë një përmirësim afatshkurtër të mirëqenies, ajo nuk mund të zëvendësojë rritjen e qëndrueshme që vjen nga prodhimi real, investimet private dhe eksportet.
Ekspertët theksojnë nevojën për një qasje më të balancuar, ku përveç mbështetjes së shtetit, të ndërmerren hapa konkretë për të fuqizuar bujqësinë, për të modernizuar industrinë dhe për të zhvilluar më tej sektorët me potencial të lartë si turizmi, teknologjia dhe energjia e rinovueshme. /Skyweb.al
