Kryeministri Edi Rama deklaroi sot se qeveria do të aplikojë masa të forta ndaj ndërtimeve pa leje, duke sqaruar se kufiri do të përcaktohet sipas përqindjes së shkeljes.
“Deri në masën 10% konfiskohet ajo shtesë dhe i jepet shtetit ose të pastrehëve. Mbi masën 10%, konfiskohet e gjitha nga shteti”, u shpreh Rama.
Kryeministri shtoi se ky akt ligjor do të prekë edhe ndërtesat e braktisura.
Sipas tij, të gjitha objektet e lëna në harresë do të prishen, konfiskohen ose do t’u nënshtrohen procedurave ligjore ndaj pronarëve që i kanë lënë në atë gjendje.
Ai theksoi gjithashtu se problem i madh mbeten edhe muret rrethuese, të cilat, sipas rregullave të reja, do të duhet të përshtaten me modele tip të miratuara.
“Ky vend nuk mund të mbetet peng i ndërtimeve pa leje dhe objekteve të lëna pas dore. Është koha të vendosim rregull”, tha Rama. /skyweb.al
