Aeroporti i Mynihut, një nga më të mëdhenjtë në Evropë, u detyrua të mbyllet për shtatë orë natën e kaluar pas raportimeve për praninë e disa dronëve aty pranë.
Incidenti ndodhi rreth orës 21:30, kur dëshmitarë raportuan pamjen e dronëve mbi pistën e aeroportit.
Rreth një orë më vonë, mjete të tjera ajrore pa pilot u panë sërish, çka u konfirmua edhe nga zëdhënësi i Policisë Federale, Stefan Bayer.
Nga ndërprerja u prekën rreth 3.000 pasagjerë.
Sipas autoriteteve, u pezulluan 17 fluturime dhe 15 të tjera u devijuan drejt aeroporteve të Shtutgartit, Nurembergut, Frankfurtit dhe Vjenës.
Aeroporti rifilloi operimin në orën 05:00 të mëngjesit, kur u konsiderua se mbërritjet dhe nisjet mund të kryheshin në kushte sigurie.
Ky nuk është rasti i vetëm në Evropë.
Aeroportet e Kopenhagenit dhe Oslos janë detyruar gjithashtu të ndalojnë operimet pas pranisë së dronëve.
Autoritetet evropiane e shohin këtë si pjesë të një lufte hibride që lidhet me tensionet me Rusinë.
Së fundmi, janë raportuar edhe 20 dronë rusë mbi Poloni, ndërsa avionë luftarakë MiG-31 hynë në hapësirën ajrore të Estonisë.
Përballë rritjes së incidenteve, vendet evropiane po ndërmarrin një nismë të re: një rrjet sistemi zbulimi dhe përgjimi kundër dronëve, të cilin e quajnë “mur” mbrojtës.
Nuk do të jetë një mur fizik, por një infrastrukturë e teknologjisë së avancuar që synon të parandalojë rrezikun e mjeteve ajrore pa pilot pranë aeroporteve dhe zonave të ndjeshme. /skyweb.al
