Qindra qytetarë morën pjesë në një stërvitje të madhe evakuimi në kryeqytetin lituanez këtë javë, në kuadër të përgatitjeve kombëtare për skenarë të mundshëm krizash në kufirin lindor të NATO-s. Stërvitja vjen në një moment kur tensionet me Rusinë dhe aleaten e saj Bjellorusinë vazhdojnë të rriten.
Rreth 100 banorë të Vilniusit u zhvendosën me tren në një arenë sportive rreth 100 kilometra larg qytetit, ku ishin përgatitur shtretër kampingu dhe pajisje bazë jetese. Stërvitja kishte për qëllim të testonte logjistikën dhe bashkëpunimin ndërinstitucional në rast të një evakuimi real.
“Po flasim për të gjithë qytetin,” tha Valdas Benkunskas, Kryetari i Bashkisë së Vilniusit. “Nëse një situatë kërkon evakuimin e kryeqytetit, duhet të jemi gati për të zhvendosur jo vetëm një lagje, por potencialisht të gjithë popullsinë.”
Vilniusi, me afërsisht 700,000 banorë dhe vetëm 20 kilometra larg kufirit me Bjellorusinë, është konsideruar zonë e ndjeshme në rast të një konflikti rajonal.
Autoritetet kanë caktuar pika grumbullimi në qytet, si dhe rrugë të veçanta për evakuim me autobusë dhe trena, duke shmangur rrugët që mund t’u nevojiten forcave ushtarake. Furnizimet si shtretër portativë, artikuj higjienikë dhe pajisje të tjera emergjente janë vendosur në depo të dedikuara.
Në qytetin Kaunas, 10 kisha janë përgatitur për të strehuar banorët, duke ofruar ambiente nëntokësore dhe hapësira të improvizuara për raste emergjente. “Nuk janë të gjitha kishat të pajisura në këtë mënyrë, por kemi hapësira të mjaftueshme për situata të papritura,” u shpreh Arqipeshkvi Kestutis Kevalas.
Qeveria e vendit u ka bërë thirrje qytetarëve që të mbajnë furnizime për disa ditë dhe një çantë emergjence që përmban dokumente personale, si certifikata lindjeje, martese dhe dëshmi pronësie.
Planet parashikojnë evakuimin e deri në 400,000 banorëve që jetojnë brenda një rrezeje prej 40 kilometrash nga kufijtë lindorë të vendit, në rast se konflikti në Ukrainë përhapet më tej.
Ndërsa Rusia mohon çdo qëllim për të sulmuar vendet e NATO-s, Lituania dhe fqinjët e saj baltikë dhe Polonia kanë intensifikuar përgatitjet për çdo skenar, përfshirë ndërprerje të transportit, flukse të mëdha emigrantësh ose konflikte të armatosura. /Skyweb.al
