Versioni më i fundit i mjetit të inteligjencës artificiale për krijimin e videove, Sora, nga OpenAI, është shkarkuar mbi një milion herë brenda më pak se pesë ditësh, duke arritur këtë shifër më shpejt se vetë ChatGPT në momentin e lançimit.
Aplikacioni, që ndodhet në krye të Apple App Store në SHBA, gjeneron video 10 sekondëshe me pamje realiste duke u bazuar vetëm në përshkrime me tekst.
Lajmi u bë i ditur nga drejtuesi i Sora-s, Bill Peebles, përmes një postimi në platformën X, ku ai theksoi “rritjen e vrullshme” të përdoruesve, pavarësisht se aplikacioni është aktualisht i disponueshëm vetëm për përdorues të ftuar në Amerikën e Veriut.
Megjithatë, suksesi i shpejtë i aplikacionit është shoqëruar edhe me kritika të shumta, sidomos për mënyrën se si trajton materialet me të drejtë autori dhe imazhet e figurave publike të ndjera, çka ka ngjallur debat të gjerë në rrjetet sociale. /Skyweb.al
