Organizata Botërore e Shëndetësisë (OBSH) ka vlerësuar se rreziku i përhapjes së virusit vdekjeprurës Nipah përtej Indisë mbetet i ulët. Megjithatë, disa vende aziatike, përfshirë Hong Kongun, Malajzinë, Singaporin, Tajlandën dhe Vietnamin, kanë forcuar këtë javë kontrollet në aeroporte, pasi India konfirmoi dy raste infeksioni.
“OBSH-ja e konsideron të ulët rrezikun e përhapjes së mëtejshme nga këto dy raste”, deklaroi agjencia, duke theksuar se autoritetet indiane kanë kapacitetet e nevojshme për të menaxhuar dhe përmbajtur shpërthime të tilla. Ajo shtoi gjithashtu se aktualisht nuk ka prova për rritje të transmetimit nga njeriu te njeriu dhe se po bashkëpunon ngushtë me institucionet shëndetësore të Indisë.
Megjithatë, OBSH-ja nuk përjashtoi mundësinë e ekspozimeve të reja ndaj virusit, i cili qarkullon natyrshëm te popullatat e lakuriqëve të natës në disa zona të Indisë dhe Bangladeshit fqinj.
Virusi Nipah transmetohet kryesisht nga lakuriqët e natës që ushqehen me fruta, si dhe nga kafshë të tjera, përfshirë derrat. Ai mund të shkaktojë simptoma të rënda, si ethe dhe inflamacion të trurit (encefalit). Shkalla e vdekshmërisë varion nga 40% deri në 75%, dhe aktualisht nuk ekziston një kurë, edhe pse disa vaksina janë në fazë testimi.
Infeksioni kalon te njerëzit përmes kontaktit me lakuriqë nate të infektuar ose me fruta të kontaminuara. Transmetimi nga njeriu te njeriu është i rrallë dhe zakonisht kërkon kontakt të zgjatur dhe të afërt me personat e infektuar./skyweb.al
