Kërkimet shkencore po zbulojnë gjithnjë e më shumë ndikimin e jashtëzakonshëm që kanë mikrobet e para që hyjnë në trupin e një foshnje menjëherë pas lindjes. Ato jo vetëm formësojnë shëndetin në muajt e parë, por mund të lënë një gjurmë që zgjat gjithë jetën.
Është viti 2017, dhe në laboratorin e patologjisë të Spitalit Queen’s në Londër, dy teknikë presin me padurim postën e ditës. Në ditët më të ngarkuara, aty mbërrijnë deri në 50 paketa të vogla, secila e mbështjellë me kujdes dhe që përmban një “thesar” të veçantë, një mostër të vogël jashtëqitjeje foshnjash, marrë me përkushtim nga prindërit e tyre.
Këto mostra janë pjesë e studimit “Baby Biome”, një projekt që synon të kuptojë se si mikrobet që kolonizojnë zorrët e një të porsalinduri ndikojnë në shëndetin e tij në të ardhmen. Midis viteve 2016 dhe 2017, laboratori analizoi jashtëqitjet e 3,500 foshnjave të porsalindura, në përpjekje për të kuptuar se si formohet mikrobioma e zorrëve, bashkësia e triliona baktereve, kërpudhave dhe viruseve që jetojnë në traktin tretës të çdo njeriu.
Sipas studiueses Archita Mishra, periudha e 1000 ditëve të para të jetës është një “dritare e artë” gjatë së cilës mikrobioma e zorrëve krijon një ndikim afatgjatë në organizëm.
Profesor Nigel Field, drejtues i projektit dhe epidemiolog në University College London (UCL), shpjegon: “Rreth tre apo katër ditë pas lindjes fillon të shfaqet ‘nënshkrimi’ i parë mikrobik në zorrë. Foshnja është në thelb sterile në momentin e lindjes. Kështu që ai është një moment jashtëzakonisht i rëndësishëm për sistemin imunitar, trupi për herë të parë vjen në kontakt me mikrobet.”
Pas disa ditësh, çdo foshnjë zhvillon mikrobiomën e vet unike të zorrëve. Studiuesit besojnë se kjo bashkësi mikroorganizmash luan një rol thelbësor në shëndetin e njeriut. Tek të rriturit, këto mikrobe ndihmojnë në tretjen e fibrave të vështira, prodhojnë enzimat e nevojshme për sintezën e disa vitaminave, dhe mbrojnë trupin nga patogjenët e dëmshëm. Disa prej tyre madje sekretojnë antibiotikë natyralë që ndihmojnë në luftimin e infeksioneve.
Por përfitimet e një mikrobiome të shëndetshme shtrihen përtej sistemit tretës. Studime të reja sugjerojnë se ajo mund të ndihmojë edhe në mbrojtjen kundër çrregullimeve mendore si ankthi dhe depresioni, madje edhe sëmundjeve neurodegjenerative si Alzheimeri.
Nga ana tjetër, një mikrobiomë “e pashëndetshme” është e lidhur me një sërë sëmundjesh të rënda: sëmundje kardiovaskulare, kancer kolorektal, diabet, sëmundje kronike të veshkave, obezitet dhe sëmundje inflamatore të zorrëve. /Skyweb.al
