Barcelona po shkon drejt një prej taksave turistike më të larta në Evropë, pasi autoritetet vendase kanë vendosur të rrisin ndjeshëm tarifën që paguajnë vizitorët për çdo natë qëndrimi.
Masa synon të frenojë mbingarkesën turistike dhe njëkohësisht të gjenerojë të ardhura për përballimin e krizës së strehimit në qytet.
Parlamenti rajonal i Katalonjës ka miratuar dyfishimin e taksës për klientët e hoteleve, e cila nga prilli pritet të arrijë nga 10 deri në 15 euro për natë, në varësi të kategorisë së akomodimit. Deri tani tarifa varionte nga rreth 5 deri në 7.5 euro për natë.
Në praktikë, kjo do të thotë se një çift që qëndron dy netë në një hotel me katër yje mund të paguajë mbi 45 euro shtesë vetëm për taksën turistike, ndërsa në hotelet me pesë yje tarifa mund të arrijë në 15 euro për person në natë.
Edhe pasagjerët e kroçerave do të vijojnë të paguajnë rreth 6 euro.
Vendimi vjen në një moment kur presioni nga banorët vendas është rritur, për shkak të ndikimit që turizmi masiv ka pasur në rritjen e çmimeve të banesave dhe qirave afatshkurtra.
Sipas planit, një pjesë e të ardhurave nga taksa do të përdoret drejtpërdrejt për politikat e strehimit të përballueshëm.
Autoritetet kanë paralajmëruar gjithashtu se deri në vitin 2028 synojnë të ndalojnë plotësisht akomodimet me qira afatshkurtër, ndërsa edhe vizitorët që qëndrojnë në apartamente turistike do të përballen me tarifa më të larta, deri në 12.5 euro për natë.
Para kësaj rritjeje, Barcelona renditej ndër qytetet me taksë të lartë turistike në Evropë, por ende pas qyteteve si Amsterdami, ku tarifa ditore për vizitorët mbetet më e larta në kontinent. /skyweb.al
