Numri i automjeteve në Shqipëri është rritur me rreth 160 për qind gjatë një dekade, duke reflektuar një rritje të ndjeshme të nivelit të motorizimit në vend.
Sipas të dhënave zyrtare të INSTAT, gjatë vitit 2025 në Shqipëri kanë qarkulluar më shumë se 1 milion automjete, ndërkohë që në vitin 2015 ky numër ishte 403 mijë.
Krahasuar me dhjetë vite më parë, rezulton një rritje prej mbi 644 mijë automjetesh, ose afro 160 për qind më shumë.
Të dhënat tregojnë se rritja ka qenë progresive nga viti në vit, por kulmi është shënuar gjatë vitit 2025, ku për herë të parë numri i automjeteve aktive në vend ka kaluar pragun e një milion mjeteve.
Ndërkohë, sipas statistikave të Drejtorisë së Përgjithshme të Shërbimeve të Transportit Rrugor, vitet e fundit është rritur ndjeshëm edhe numri i makinave të reja që regjistrohen për herë të parë në vend.
Ky zhvillim ka ndikuar drejtpërdrejt në rinovimin gradual të flotës së automjeteve, e cila për shumë vite ishte dominuar nga mjete të vjetra dhe me standarde të ulëta teknike.
Paralelisht me këtë tendencë, është rritur edhe prania e automjeteve elektrike në tregun shqiptar.
Sipas të dhënave të INSTAT, gjatë tremujorit të katërt të vitit 2025, marka BYD është futur për herë të parë në katër markat më të regjistruara të makinave të reja, duke përbërë 6.2 për qind të numrit total të automjeteve të regjistruara në këtë periudhë.
Të dhënat sinjalizojnë një transformim të tregut të automjeteve në Shqipëri, ku krahas rritjes së fortë numerike, po vihet re edhe një zhvendosje graduale drejt mjeteve më të reja dhe teknologjive elektrike. /skyweb.al
