Shqipëria po afirmohet si një destinacion turistik i qëndrueshëm dhe tërheqës gjatë gjithë vitit, duke ofruar një gamë të gjerë përvojash, nga plazhet dhe natyra e paprekur, te qytetet historike, kultura, arti dhe gastronomia tradicionale.
Sipas ministrisë së Turizmit gjatë periudhës janar–shtator 2025, Shqipëria ka pritur 10,228,686 vizitorë, një rritje prej 6% krahasuar me të njëjtën periudhë të vitit 2024.
“Ky trend pozitiv është dëshmi e zhvillimit të qëndrueshëm të sektorit të turizmit dhe e angazhimit të përbashkët për ta pozicionuar Shqipërinë si një destinacion mikpritës dhe gjithnjë e më atraktiv,” shkroi në rrjetet sociale ministri Blendi Gonxhja.
Me një ofertë që përfshin Alpet e bukura, vijën bregdetare mahnitëse, trashëgiminë historike dhe kulturën e pasur, vendi po tërheq turistë të profileve të ndryshme nga një numër gjithnjë e më i gjerë tregjesh ndërkombëtare.
Përveç bregdetit dhe klimës së favorshme, gjithnjë e më shumë vizitorë po zgjedhin të eksplorojnë zonat malore, qytetet e lashta, dhe të përjetojnë mikpritjen karakteristike shqiptare dhe kuzhinën autentike lokale. /Skyweb.al
