Parlamenti grek ka miratuar një ligj të debatueshëm që lejon ditë pune deri në 13 orë, një vendim që ka shkaktuar protesta të shumta nga punëtorët, të cilët tashmë përballen me kosto të lartë jetese.
Sipas të dhënave zyrtare, Greqia regjistroi vitin e kaluar javën më të gjatë të punës në Bashkimin Evropian, me një mesatare prej 39.8 orësh në javë, ndërsa paga minimale mujore mbetet ndër më të ulëtat në BE, rreth 968 euro.
Ligji i ri përcakton se orari i zgjatur do të jetë opsional dhe do të zbatohet vetëm në sektorin privat, për jo më shumë se 37 ditë në vit.
Përveç kësaj, mbeten në fuqi kufijtë e tanishëm të punës vjetore dhe standardi 40-orësh javor, ndërsa ora shtesë vjetore është kufizuar në 150 orë.
Qeveria greke argumenton se masa synon të rrisë fleksibilitetin në tregun e punës dhe të përshtatet me nevojat e bizneseve, por sindikatat e konsiderojnë atë si një hap prapa në të drejtat e punëtorëve.
Protestuesit kanë paralajmëruar greva të reja në ditët në vijim. /skyweb.al
