Adela Xhemali ka marrë mandatin si anëtare e Bordit të Autoritetit të Mbikëqyrjes Financiare dhe do të ushtrojë funksionin e Drejtores së Përgjithshme Ekzekutive. Emërimi u miratua nga Kuvendi i Shqipërisë me vendimin nr. 102/2025, datë 4 dhjetor 2025.
Ceremonia zyrtare e prezantimit u zhvillua në ambientet e AMF-së, ku morën pjesë kryetarja e Komisionit për Ekonominë, Punësimin dhe Financat, Milva Ekonomi, anëtarë të Bordit Drejtues, drejtues të institucionit, si edhe drejtoresha në përfundim të mandatit, Mimoza Kaçi.
Në fjalën e saj, Milva Ekonomi theksoi rëndësinë e drejtimit të suksesshëm të Autoritetit në një moment kur sfidat e integrimit evropian kërkojnë mbikëqyrje të fortë të tregut financiar jobankar dhe përputhje të plotë me legjislacionin e Bashkimit Evropian. Ajo vuri në dukje nevojën për forcimin e standardeve të transparencës dhe besueshmërisë institucionale.
Në fjalën e saj të parë si drejtuese e institucioni, Adela Xhemali falënderoi Kuvendin për besimin dhe theksoi se integriteti dhe përgjegjshmëria do të udhëheqin punën e Autoritetit. Ajo nënvizoi se prioritetet do të fokusohen në avancimin e procesit të integrimit evropian, zhvillimin teknologjik e inovacionin, forcimin e transparencës dhe rritjen e standardeve të mbikëqyrjes e mbrojtjes së konsumatorit.
Sipas saj, kombinimi i përvojës së konsoliduar me energjinë e brezit të ri do të forcojë më tej kapacitetet dhe rolin e institucionit.
Autoriteti i Mbikëqyrjes Financiare do të vazhdojë të garantojë stabilitet financiar, transparencë dhe rritje të besimit në tregjet jobankare, në funksion të mbrojtjes së konsumatorëve dhe investitorëve.
Mimoza Kaçi do të mbahet mend si drejtuesja që e nxori nga shinat tregun e sigurimeve për herë të parë pas shumë viteve pune të bërë nga drejtuesit e mëparshëm, si edhe për pagesat e majme ndaj vetes, ashtu siç u konstatua edhe nga Komisioni i Ekonomisë në Kuvend. /skyweb.al
