Në juglindje të Shqipërisë, aty ku malet zbresin butësisht në luginat që shtrihen përgjatë rrjedhës së lumit të fundit të egër në Evropë, Vjosës, ndodhet një vend pak i njohur dhe i rrallëherë i përmendur në guidat turistike, Leskoviku. Kështu shkruan faqja e njohur italiane e turizmit dhe kulinarisë gamberorosso.it.
Në artikullin kushtuar qytetin juglindor, Leskoviku përshkruhet si një zonë e vogël dhe e izoluar, ku deri para disa vitesh banorët jetonin kryesisht nga bujqësia familjare, blegtoria dhe prodhimi artizanal i verës, duke qenë pak i njohur jashtë kufijve të Shqipërisë.
Sipas medias italiane, sot, kjo zonë po fiton vëmendje si një nga rajonet më interesante të verës në vend, falë varieteteve të rrushit vendase dhe një mikroklime unike, me ndryshime të mëdha temperature, vera të ngrohta por pa lagështi, dimra të ftohtë dhe reshje të shpeshta dëbore si dhe investimeve nga familjet lokale që bashkojnë pasionin, traditën dhe cilësinë moderne.
“Një shembull i kësaj tradite është kantina familjare “Max Mavrud”, themeluar nga Fejzullat për të ringjallur traditën e verërave lokale, duke nxjerrë në pah varietete të rrushit vendës dhe duke ruajtur identitetin e vreshtarit të këtij rajoni të largët, pranë kufirit me Greqinë.
Vreshtat e “Max Mavrud” shtrihen në 17 hektarë tokë gëlqerore në lartësi 750-780 metra mbi nivelin e detit, me ekspozim nga lindja në perëndim dhe shpate që shtrihen nga jugu, që sigurojnë balancën ideale mes aciditetit, pjekurisë dhe freskisë së rrushit, siç tregon themeluesi Maksim Fejzulla.
Nga këto vreshta, të vendosura mes rezervateve natyrore Shelegur Germenj dhe Piskal Shqeri, lumit Vjosë dhe burimeve termale, lind vera e kuqe “Trio3”, e cila është një përzierje e rrushit mavrud (50%), merlot (30%) dhe syrah (20%). Vera qëndron për katër muaj në fuçi lisi franceze dhe hungareze, duke dhënë një shije të thellë dhe intensive, si territori që e ka frymëzuar, shpjegon prodhuesi Bledar Laçi.
Në Leskovik kultivohen edhe varietete të tjera si pinoti dhe debina, të cilat përdoren edhe për prodhimin e rakisë”, shkruhet në artikull.
Në fillim të këtij viti, një ekip shkencëtarësh çekë dhe speleologësh zbuloi në këtë zonë liqenin termik nëntokësor më të madh në botë, të quajtur Liqeni Neuron, që përmban mbi 8,000 metra kub ujë, sa katër pishina olimpike. /Skyweb.al
