Ministria e Mbrojtjes ka përgatitur një plan të detajuar mbi mënyrën se si do të shpërndahen fondet e mbrojtjes, në përputhje me objektivin e NATO-s për financimin e sektorit në nivelin 5% të Prodhimit të Brendshëm Bruto (PBB). Sipas këtij plani, 3.5% e PBB-së do të përdoret për kapacitetet e mirëfillta mbrojtëse, ndërsa 1.5% e PBB-së do të investohet në infrastrukturë, qëndrueshmëri dhe zhvillim të industrisë ushtarake vendase.
Këto fonde do të përdoren për modernizimin e Forcave të Armatosura, ndërtimin e infrastrukturës strategjike si Korridori VIII dhe Porti i Porto Romanos – projekte të bashkëfinancuara me NATO-n – si dhe për përmirësimin e aseteve ajrore dhe logjistike të vendit.
Ministria sqaron se në Uzinën e Autotraktorëve nuk do të prodhohen armë apo municione, ndërsa kompanitë që do të merren me prodhimin dhe eksportin e pajisjeve ushtarake duhet të licencohen pranë Autoritetit të Kontrollit Shtetëror të Eksporteve (AKSHE) në Ministrinë e Mbrojtjes. Vetëm pas këtij procesi, mallrat ushtarake mund të eksportohen ligjërisht.
Në një kontekst të ri gjeopolitik dhe sigurie, industria ushtarake shqiptare po kalon nga një fazë pasive në një rol aktiv e prodhues, duke u pozicionuar si një aktor i ri në tregun ndërkombëtar të sigurisë. Objektivi është që ajo të shërbejë jo vetëm për nevojat e brendshme të Forcave të Armatosura, por edhe për eksport në tregjet e NATO-s.
Sipas Ministrisë së Mbrojtjes, modeli që po zbatohet është bashkëpunimi mes shtetit dhe kompanive private vendase e të huaja, që mundëson transferim teknologjie, rritje të kapaciteteve prodhuese dhe përfshirje të bizneseve shqiptare në zinxhirin global të mbrojtjes.
Zhvillimi i industrisë ushtarake pritet të ketë efekte shumëfishuese në ekonomi, duke hapur vende të reja pune në prodhim, inxhinieri, logjistikë dhe teknologji, si dhe duke rigjallëruar zonat industriale të lëna pas dore si Rubiku, Shkoza, Poliçani dhe Gramshi. Paralelisht, investimet pritet të rrisin vlerën e pasurive dhe të nxisin zhvillimin urban, si dhe të forcojnë arsimin profesional në fusha teknike.
Sipas planit të ministrisë, industria ushtarake shqiptare do të fokusohet në montimin e mjeteve të blinduara, prodhimin e uniformave dhe municioneve të vogla, montimin e armëve të lehta dhe artilerisë vetëlëvizëse 155 mm, si dhe zhvillimin e dronëve me teknologji të avancuar. Në Kantierin Detar të Pashalimanit do të ndërtohen anije të reja ushtarake, duke afruar Shqipërinë me standardet teknike dhe operacionale të vendeve të tjera të NATO-s.
Në linjë me vendimet e Samitit të NATO-s në Uashington, Shqipëria synon të bëhet një kontribuese aktive në arkitekturën e sigurisë euroatlantike, duke ndërtuar një industri mbrojtëse të aftë të mbështesë aleatët dhe të prodhojë produkte “Made in Albania” për eksport.
Ministria e Mbrojtjes thekson se industria e mbrojtjes nuk është më një sektor i izoluar teknik, por një instrument modernizimi, zhvillimi ekonomik dhe forcimi të sovranitetit kombëtar. /skyweb.al
