Udhëtimet vetëm po bëhen një trend botëror, teksa gjithnjë e më shumë njerëz kërkojnë lirinë, pavarësinë dhe zhvillimin personal që ato ofrojnë. Megjithatë, për ata që nisen për herë të parë, sfidat si kostoja, siguria dhe zgjedhja e destinacionit mund ta bëjnë udhëtimin po aq stresues sa emocionues.
Sipas të dhënave të “Riviera Travel”, një nga operatorët më të mëdhenj të udhëtimeve dhe kroçerave, interesimi për pushime individuale është rritur me 99% nga viti në vit vetëm në periudhën janar–qershor. Menaxherja e produkteve të udhëtimeve solo, Linda Harris, jep përgjigje për disa nga pyetjet më të kërkuara në Google rreth këtij trendi që po ndryshon mënyrën e udhëtimit në botë.
Si të udhëtosh vetëm
Kjo është pyetja më e kërkuar në Google me mbi 65 mijë kërkesa në muaj. Sipas Harris, një udhëtim i suksesshëm vetëm kërkon planifikim të kujdesshëm – nga zgjedhja e destinacionit dhe organizimi i transportit, te menaxhimi i kostove.
“Ai që udhëton vetëm duhet të studiojë mirë vendin ku shkon dhe të vendosë sigurinë në plan të parë,” thekson ajo.
Ku të udhëtosh vetëm
Me 30 mijë kërkesa mujore, kjo është pyetja e dytë më e shpeshtë. Harris këshillon të zgjidhen destinacione të sigurta, me transport të organizuar mirë dhe ku anglishtja flitet gjerësisht. Vendet me kosto të përballueshme dhe klimë të përshtatshme janë ideale për fillestarët.
Ajo përmend Vietnam-in si destinacion të shkëlqyer për kulturë dhe natyrë, ndërsa SHBA dhe Mbretërinë e Bashkuarsi zgjedhje të mira për komunikim të lehtë.
Çfarë është udhëtimi solo
Ky term përkufizohet si udhëtim pa shoqërues, ku udhëtari është plotësisht i pavarur në vendimmarrje. Por në kuptimin më të gjerë, është një mënyrë për të njohur botën dhe vetveten.
Për ata që ndihen të pasigurt, pushimet solo në grup ofrojnë një alternativë të ndërmjetme – liri personale, por edhe mbështetje sociale.
Çfarë të bësh dhe kur të udhëtosh
Një udhëtim vetëm është mundësia për të zbuluar kultura të reja dhe për të marrë pjesë në aktivitete lokale. Ekspertët këshillojnë që përveç itinerarit të planifikuar, të lini hapësirë për spontanitet.
Koha më e mirë për të udhëtuar varet nga destinacioni, por muajt prill, maj, shtator dhe tetor ofrojnë balancën më të mirë mes kushteve dhe mungesës së turmave.
Pse të udhëtosh vetëm
Kjo pyetje ka rreth 9 mijë kërkesa mujore, dhe përgjigjja është e thjeshtë: për të njohur më mirë veten.
“Udhëtimet vetëm janë një përvojë që të ndryshon jetën,” thotë Harris. “Ato nxisin vetëbesimin, zhvillojnë aftësi si marrja e vendimeve dhe komunikimi, dhe u japin njerëzve mundësinë të dalin nga zona e tyre e rehatisë.”
Cilat janë vendet më të mira për udhëtim solo
Për ata që nisen për herë të parë, Harris rekomandon Francën dhe Spanjën si destinacione të sigurta dhe të aksesueshme. Për udhëtarët me përvojë, ajo përmend Indinë, Afrikën e Jugut dhe Ekuadorin si vende transformuese.
Si të udhëtosh vetëm në mënyrë të sigurt
Siguria është thelbësore. “Përpiquni të qëndroni në vende publike, ndani itinerarin me familjen dhe mos hezitoni të ndryshoni planet nëse ndiheni në siklet,” këshillon Harris.
Ajo shton se pushimet solo në grup janë një zgjedhje e mirë për ata që duan eksperiencën, por me një rrjet mbështetjeje.
Si të udhëtosh vetëm me buxhet të ulët
Planifikimi i hershëm dhe zgjedhja e periudhës jashtë sezonit janë çelësi për të kursyer. “Rezervoni herët dhe lini gjithmonë fonde emergjente,” këshillon Harris.
Çfarë është udhëtimi solo në grup
Edhe pse duket paradoks, kjo formë po bëhet gjithnjë e më popullore. Ajo u drejtohet personave që kërkojnë pavarësi, por jo vetmi.
“Pushimet solo në grup janë mënyra më e mirë për të hyrë në botën e udhëtimeve vetëm – është përvojë e vërtetë, por me një rrjet sigurie,” përfundon Harris.
Në fund, një gjë është e qartë: udhëtimi vetëm nuk është më tabu. Është një mënyrë e re për të parë botën – dhe për të parë veten nga një kënd tjetër. /Forrbes. Përktheu: Skyweb.al
