Aksionet e kompanisë Apple u rritën ndjeshëm të hënën, duke çuar kapitalin e saj në afro 3.9 trilionë dollarë, duke e afruar në këtë mënyrë kompaninë me pragun prej 4 trilionësh. Kjo rritje vjen si pasojë e kërkesës së fuqishme për modelin më të ri të telefonit, iPhone 17. Sipas firmës së analizës Counterpoint Research, shitjet e këtij modeli në dhjetë ditët e para kanë qenë 14 për qind më të larta në krahasim me modelin paraardhës, iPhone 16, sidomos në tregjet kryesore si SHBA dhe Kina.
Rritja e aksioneve me 4.2 % në 262.90 dollarë për aksion, i dha një shtysë të fortë optimizmit për të ardhmen e afërt të kompanisë. Analistët e firmës Evercore ISI vendosën ta shtojnë Apple në listën e tyre të kompanive me potencial të lartë për tejkalim të pritshmërive, duke theksuar që gjasat janë që Apple të japë një parashikim pozitiv për tremujorin e fundit të vitit.
Një nga arsyet që ka ndikuar në këtë optimizëm është nisja e porosive online për iPhone 17 në Kinë, çka ka rritur mundësitë për rritje të të ardhurave gjatë periudhës së festave. Linja e re e iPhone-ëve, përfshirë një model më të hollë të quajtur “iPhone Air”, u prezantua në shtator dhe erdhi pa rritje çmimi, pavarësisht sfidave të tarifave amerikane për produktet e importuara nga Kina. /Skyweb.al
