Revista britanike The Economist shkruan se tregu i kompanive ushtarake private (PMCs) po përjeton një rritje të ndjeshme në mbarë botën, ndërsa konfliktet e reja dhe mungesa e burimeve njerëzore në ushtritë tradicionale po shtojnë kërkesën për luftëtarë me pagesë.
Duke iu referuar analizës, revista kujton fjalët e filozofit italian Niccolò Machiavelli, i cili i quante mercenarët “të padobishëm dhe të rrezikshëm”, por thekson se pas 500 vitesh, ky biznes po lulëzon më shumë se kurrë.
Sot kompanitë private ushtarake operojnë në shumë forma — nga rojet e sigurisë në misione humanitare, deri te njësitë luftarake që veprojnë në zona konflikti.
Shembuj konkretë përmenden në artikull: kompania amerikane UG Solutions është angazhuar për të siguruar ndihmat humanitare në Gaza, ndërsa Rusia ka përdorur Wagner Group, një strukturë e mbështetur nga Kremlini dhe e përbërë nga ish-pjesëtarë të forcave speciale.
Në luftën në Ukrainë, ndër luftëtarët përfshihen edhe mercenarë kolumbianë, ndërkohë që në Perëndim, qeveria amerikane mbetet klientja më e madhe e këtyre kompanive, sipas analistit britanik Dominick Donald.
Artikulli nënvizon se konfliktet moderne, përveç tragjedive njerëzore, po nxisin edhe një bum ekonomik në industrinë e luftës me pagesë, një fenomen që po e kthen mercenarinë nga stigmat historike në një biznes fitimprurës dhe të institucionalizuar në nivel global. /skyweb.al
