Ka përfunduar faza e ndërgjegjësimit dhe Administrata Tatimore pritet të nisë kontrollet në terren në sektorin e ndërtimit, me fokus deklarimin real të pagave dhe kontributeve të sigurimeve shoqërore.
Në njoftimin zyrtar bëhet me dije se, pas rreth 30 ditësh nga publikimi i listës së pagave indikative sipas profesioneve, konkretisht duke filluar nga data 15 janar, do të nisin verifikimet në subjektet e ndërtimit të vlerësuara me risk për nëndeklarim pagash.
Kontrollet do të përqendrohen kryesisht te kompanitë që janë njoftuar më herët nga Administrata Tatimore, por nuk kanë reflektuar asnjë ndryshim në listëpagesa, pavarësisht mesazheve elektronike të dërguara në llogaritë e tyre në sistemin e-Filing.
Sipas Tatimeve, fokusi i kontrolleve do të jetë krahasimi i pagave të deklaruara në listëpagesa me pagat indikative sipas profesioneve përkatëse, të cilat janë publikuar në faqen zyrtare të Administratës Tatimore dhe janë përcjellë njëkohësisht në llogaritë elektronike të tatimpaguesve.
Administrata Tatimore paralajmëron se çdo subjekt që deklaron paga nën nivelin orientues ose që ndryshon artificialisht profesionin e punonjësve me qëllim shmangien e deklarimit real të pagave, do të konsiderohet subjekt me risk të lartë dhe do t’i nënshtrohet kontrollit nga strukturat e specializuara.
Në njoftim theksohet se nëndeklarimi i pagave dhe mosdeklarimi i punonjësve përbën shkelje të rëndë ligjore, pasi dëmton drejtpërdrejt pagesën e kontributeve shoqërore dhe garantimin e pensioneve të ardhshme.
Tatimet u bëjnë thirrje të gjithë tatimpaguesve në sektorin e ndërtimit të marrin masat e nevojshme ligjore për deklarimin e saktë të punonjësve dhe pagave reale, me qëllim shmangien e masave administrative dhe procedurave ligjore.
Në mesazhin elektronik të dërguar më 15 dhjetor 2025, Administrata Tatimore informon subjektet se disponon të dhëna të detajuara nga burime të ndryshme, përfshirë APT, pushtetin vendor, agjencitë imobilare, deklaratat tatimore, listëpagesat mujore, faturat e fiskalizuara, si dhe të dhënat e deklaruara nga furnitorët për mallra dhe shërbime.
Tatimpaguesit janë paralajmëruar për detyrimin e deklarimit të çdo punonjësi të punësuar, deklarimin real të pagave sipas profesionit dhe tregut të punës, lëshimin e faturave të fiskalizuara për çdo shitje apo transaksion, blerjen e mallrave dhe shërbimeve me faturë të rregullt tatimore, deklarimin e saktë të të dhënave në regjistrin e tatimpaguesit, kontratave të qirasë si dhe përdorimin vetëm të softuerëve të certifikuar të fiskalizimit.
Sipas Tatimeve, çdo sjellje mospërmbushëse që synon shmangien tatimore do ta kategorizojë subjektin si me risk, duke çuar në veprime verifikuese, monitorim të thelluar dhe hetime administrative, në bashkëpunim edhe me agjenci të tjera ligjzbatuese. /skyweb.al
