Një valë solidariteti ka përfshirë shqiptarët brenda dhe jashtë vendit për të ndihmuar Tonin dhe Nidën, dy njerëz të dashur që drejtojnë “Farma Sotira”, pas zjarrit shkatërrimtar që u dogji plotësisht shtëpinë dhe fermën në Leskovik.
Në më pak se 12 orë nga hapja e një faqeje në platformën GoFundMe, janë mbledhur 24 mijë euro nga 26 mijë të synuara, falë kontributit të qindra qytetarëve që reaguan me ndjeshmëri dhe dashuri ndaj kësaj fatkeqësie.
Fushata e iniciuar nga Nida, një prej themeluesve të fermës, ka prekur zemrat e shumë shqiptarëve që e njohin “Farma Sotira” si një simbol të punës, përkushtimit dhe jetës në harmoni me natyrën. Pamjet e shtëpisë së përfshirë nga flakët janë bërë virale në rrjetet sociale, duke nxitur një reagim të menjëhershëm human.
“Farma Sotira” njihet për produktet e saj natyrale dhe mikpritjen e ngrohtë që ka ofruar ndër vite për vizitorët në zonën e Leskovikut, duke u kthyer në një shembull të suksesshëm të turizmit rural në Shqipëri.
/skyweb
