Shumica e kompanive të sigurimeve në tregun shqiptar e mbyllën vitin 2024 me fitim, por në tërësi ato ishin më të ulëta krahasuar me një vit më parë.
Të dhënat e Autoritetit të Mbikëqyrjes Financiare (AMF) treguan se viti 2022 për tregun e sigurimeve u mbyllën me një fitim prej 2.27 miliardë lekësh, në rënie me 17.8% krahasuar me një vit më parë.
Performanca ishte përgjithësisht pozitive edhe në nivel të kompanive të veçanta, si në tregun e Jetës, ashtu edhe në atë të Jo-Jetës.
Në tregun më të madh, atë të sigurimeve të Jo-Jetës, u raportua një fitim neto prej 2 miliardë lekësh, 18% më pak krahasuar me një vit më parë. Shtatë nga tetë kompanitë që veprojnë në treg e mbyllën vitin me fitim.
Fitimin më të lartë edhe për vitin 2024 e raportoi Eurosig, me më shumë se 681 milionë lekë, ose 34% të fitimit total të tregut për vitin e kaluar. Megjithatë, fitimi i Eurosig ra me 33% krahasuar me vitin 2023.
Fitimin e dytë më të lartë e raportoi kompania Sigal UNIQA Group Austria, me 399 milionë lekë ose 20% të fitimit total neto të tregut të Jo-Jetës. Fitimi i Sigma VIG u rrit me 19.5% krahasuar me një vit më parë.
Vijon Albsig, me një fitim neto prej 307 milionë lekësh ose afërsisht 15% të totalit të fitimit neto të tregut. Fitimi neto i Albsig u rrit me 45% krahasuar me vitin 2023.
Sigma Vienna Insurance Group raportoi një fitim neto prej 286 milionë lekësh, afërsisht sa 14% e fitimit total të tregut të Jo-Jetës.
Vijon Intersig, me një fitim neto prej 161 milionë lekësh ose 8% të fitimit total të tregut. Kompania e dytë e Vienna Insurance Group e rriti fitimin me 21% krahasuar me vitin 2023.
Me fitim e mbylli vitin 2024 edhe Atlantik, në vlerën e 151 milionë lekëve, në rritje me 41% krahasuar me një vit më parë.
Kompania e dytë e grupit Eurosig, Insig, vitin e kaluar pësoi një rënie të fitimit neto në 45 milionë lekë, 81% më pak krahasuar me vitin 2023.
E vetmja kompani që raporti humbje vitin e kaluar në tregune sigurimit të jo-jetës ishte Ansig. Ansig realizoi humbje në vlerën e 24 milionë lekëve, kundrejt një rezultati me fitim neto prej 38 milionë lekësh të arritur një vit më parë.
Në tregun më të vogël, atë të sigurimit të Jetës, të gjitha kompanitë e mbyllën vitin 2024 me fitim, në shumën e 265 milionë lekëve, 18% më pak krahasuar me një vit më parë.
Struktura e fitimeve u dominua nga komania Sigal Life, me 134 milionë lekë ose sa 50% e fitimit të përgjithshëm të tregut. Megjithatë, fitimi i SIGAL Life ra me 23% krahasuar me një vit më parë.
Kompania e dytë për nga vlera e fitimit neto të realizuar u rendit Albsig Jetë, me 97 milionë lekë ose 37% të totalit. Fitimi i Albsig Jetë u rrit me 23% krahasuar me vitin e mëparshëm.
Insig Jetë e mbylli vitin 2024 me një fitim në vlerën e 48 milionë lekëve, në rënie me 8% krahasuar me një vit më parë. Ndërsa Sicred raportoi një fitim modest në vlerën e 6 milionë lekëve, në rënie me 65% krahasuar me një vit më parë.
Burimi: AMF
Burimi: AMF
