E keni dëgjuar këngën “Gjermania nuk më si përpara”? Epo ja, ky është shembulli ku ajo frazë po kthehet në realitet.
Pas afro një dekade ku Gjermania ishte ëndrra e madhe e emigrimit për mijëra shqiptarë, të dhënat e fundit tregojnë se kjo prirje po zbutet.
Sipas Zyrës Federale të Statistikave të Gjermanisë (Destatis), gjatë vitit 2024 në Gjermani kanë mbërritur rreth 19 mijë shtetas shqiptarë, ndërsa janë larguar rreth 9 mijë, duke sjellë një bilanc pozitiv prej afërsisht 10 mijë personash.
Megjithatë, krahasuar me vitet e mëparshme, ritmi i emigrimit ka rënë ndjeshëm. Në vitin 2022, Shqipëria kishte rreth 14 mijë emigrantë neto, ndërsa në 2023 afro 13 mijë, çka tregon një ngadalësim të dukshëm të fluksit drejt Gjermanisë.
Ndërkohë, Kosova dhe Serbia po e ruajnë ritmin e lartë të migracionit, madje me tendencë në rritje.
Kosova regjistroi në 2024 rreth 28 mijë hyrje dhe 9,800 dalje, duke rezultuar me një bilanc neto prej 18,400 personash. Serbia, nga ana tjetër, ka pasur mbi 20 mijë hyrje, por me më shumë kthime, çka e ul bilancin përfundimtar.
Në një panoramë më të gjerë evropiane, në krye të listës së shtetësive me më shumë emigrantë në Gjermani renditen Ukraina, Siria, Turqia, Afganistani dhe Iraku, që përbëjnë pjesën më të madhe të flukseve migratore. Vetëm Ukraina ka regjistruar mbi 115 mijë hyrje neto, e ndjekur nga Siria me 78 mijë dhe Turqia me 36 mijë, shifra që lidhen kryesisht me krizat e luftës dhe pasigurisë humanitare.
Në kontrast, migracioni nga Ballkani mbetet kryesisht ekonomik, por tashmë më i moderuar.
Një arsye kryesore për këtë ngadalësim lidhet me ndryshimet në ligjin gjerman për punëtorët e kualifikuar, i cili kërkon njohje zyrtare të diplomave, prova gjuhësore dhe dokumentacion të plotë profesional.
Në të njëjtën kohë, ngadalësimi i ekonomisë gjermane ka sjellë më pak vende pune në sektorët manualë, të ndërtimit dhe shërbimeve. Rritja e kostove të jetesës dhe inflacioni kanë bërë që shumë punëtorë shqiptarë të orientohen drejt tregjeve më afër.
Sipas burimeve të tregut të punës, Italia, Kroacia dhe Britania e Madhe po shfaqen gjithnjë e më shumë si destinacione alternative për punë sezonale ose afatshkurtër, ndërsa Gjermania po mbetet kryesisht një destinacion për punëtorët e kualifikuar dhe profesionistët teknikë.
Ekspertët e migracionit theksojnë se “epoka gjermane” e emigracionit shqiptar po hyn në një fazë të re, ku vendimet e punëtorëve po ndikohen më shumë nga fleksibiliteti, afërsia gjeografike dhe kostoja e jetesës, sesa nga premtimet e një tregu pune të largët dhe gjithnjë e më të kërkuar. /skyweb.al
