Një rast divorci në Stamboll ka tërhequr vëmendjen e mediave për një detaj të veçantë: ish-bashkëshorti do të paguajë një pension periodik për dy macet e familjes, duke hapur diskutime mbi rolin e kafshëve shtëpiake në ligjin turk.
Çifti turk vendosi të ndahej pas dy vitesh martesë, dhe gjykata vendosi që burri, Bu?ra B., t’i paguajë ish-bashkëshortes Ezgi B. 550 mijë lira turke (rreth 13 mijë euro). Por ajo që ka rënë në sy është marrëveshja për kujdesin dhe financimin e dy maceve: sipas dokumenteve të gjykatës, Bu?ra B. pranon që kujdesi i maceve t’i besohet ish-bashkëshortes.
Pension për kujdesin e maceve: 10 mijë lire çdo tremujor për 10 vjet
Marrëveshja parashikon që Bu?ra B. të paguajë 10 mijë lire turke çdo 3 muaj për shpenzimet e kujdesit të maceve, për një periudhë 10-vjeçare. Shuma do të rishikohet sipas indeksit të çmimeve të konsumit të publikuar nga Instituti Kombëtar i Statistikave në Turqi. Juristët e quajnë këtë një “pension të ri për kujdesin e kafshëve”, duke njohur rëndësinë juridike dhe emocionale të kafshëve shtëpiake përtej thjesht konceptit të pronësisë.
Ndryshime ligjore në Turqi
Sipas Kodit Civil turk, macet klasifikohen ende si “pasuri e lëvizshme”, por Ligji për Mbrojtjen e Kafshëve Nr. 5199 ka krijuar mundësi për interpretime të reja. Tani mund të përfshihen klauzola mbi mirëqenien, kujdesin dhe mbështetjen financiare të kafshëve në marrëveshjet e divorcit. Ndryshe nga më parë, ku palët mund të pajtoheshin për shpenzimet e ushqimit ose veterinarisë, ky është një angazhim afatgjatë dhe i strukturuar.
Dashuria turke për macet
Rasti nuk habit shumë ata që njohin lidhjen e ngushtë midis turqve dhe maceve. Në Turqi jetojnë mbi 4.7 milionë mace shtëpiake dhe më shumë se 5 milionë mace rrugësh, të kujdesura nga qytetarët dhe bashkitë, me sterilizim dhe kujdes veterinar. Disa raste ikonike përfshijnë macen Gli të Hagia Sofias dhe Tombili-n e Kadıköy-it, për të cilin ekziston edhe një statujë.
Një koncept i ri i familjes
Gjykata e Stambollit do të konfirmojë formalitetet, por rasti tashmë është një hap simbolik drejt një ligji më empatik që njeh vlerën emocionale të kafshëve në familje. Avokatët turq e shohin këtë si një precedent që mund të frymëzojë marrëveshje të ngjashme në të ardhmen, ndërsa rrjetet sociale e kanë pritur me mbështetje dhe simpatizim. /Skyweb.al
