Transporti hekurudhor në Shqipëri vijon të tkurret në aspektin e udhëtarëve, ndërsa mbahet gjallë kryesisht nga lëvizja e mallrave.
Sipas të dhënave të INSTAT për tremujorin e tretë 2025, vetëm 782 pasagjerë kanë përdorur trenin si mjet udhëtimi, një rënie me 62,9 % krahasuar me të njëjtën periudhë të një viti më parë.
Ndërkohë, transporti i mallrave ka shënuar rritje. Në total, 156,2 mijë ton mallra janë transportuar me hekurudhë në korrik–shtator 2025, duke u rritur me 13,7 % në raport me një vit më parë. Volumi i punës i matur në ton-kilometra arriti në 4 867,5 mijë ton-km, nga 4 546,2 një vit më parë, me një rritje prej 7,1 %.
Rrjeti hekurudhor në shfrytëzim në vend mbetet 253 kilometra, ku përfshihen linjat:
-
Kufi – Gjorm (93 km)
-
Durrës – Elbasan (76 km)
-
Rrogozhinë – Fier (49 km)
-
Fier – Vlorë (35 km).
Transporti i mallrave zhvillohet kryesisht në distanca 0–49 km, duke reflektuar karakterin industrial dhe të kufizuar të rrjetit aktual.
Sipas klasifikimit të NST 2007, mallrat më të transportuara me hekurudhë janë:
-
Qymyr, linjit, naftë bruto dhe gaz natyror – 75,8 %,
-
Mbetje të ricikluara dhe mbeturina të ngurta – 23,2 %,
-
Metale bazë dhe produkte metalike – 1 %.
Të dhënat vijnë nga Ministria e Infrastrukturës dhe Energjisë, të përpunuara nga INSTAT, dhe tregojnë se rrjeti hekurudhor shqiptar mbetet i pazhvilluar për pasagjerë, ndërsa funksionon si hallkë logjistike për transportin e mallrave industriale.
