Një hetim trevjeçar i Policisë Federale Gjermane ka hedhur dritë mbi një nga ngjarjet më të errëta të dekadës së fundit, shpërthimin e tubacioneve të gazit Nord Stream, që furnizonin Evropën me gaz rus përmes Detit Baltik.
Sipas The Wall Street Journal, hetuesit gjermanë kanë arritur në përfundimin se pas këtij sabotimi fshihet një grup ukrainas, duke ngritur tensione të reja mes aleatëve perëndimorë.
Për tre vite rresht, një skuadër elitë hetuesish është mbledhur çdo mëngjes në selinë e Policisë Federale në Potsdam, pranë Berlinit, për të zbardhur se kush qëndron pas shpërthimit të vitit 2022, i konsideruar si “akti më i madh i sabotazhit në historinë moderne”.
Rezultatet e hetimit kanë sjellë pasoja të menjëhershme politike dhe diplomatike, pasi Berlini i ka kërkuar zyrtarisht Polonisë ekstradimin e një shtetasi ukrainas të dyshuar, të quajtur Serhii K., i arrestuar në Itali dhe i përshkruar si zhytës profesionist me lidhje ushtarake.
Sipas autoriteteve gjermane, të paktën shtatë persona janë përfshirë në operacionin për shpërthimin e tubacioneve Nord Stream 1 dhe 2, mes tyre ushtarakë dhe teknikë detarë.
Hetuesit dyshojnë se grupi ka përdorur një jaht privat për të transportuar eksplozivët në fund të detit, ndërsa misioni është kryer me mbështetje logjistike dhe financiare nga burime ukrainase.
Zbulimet kanë shkaktuar çarje të thella në unitetin europian përkrah Ukrainës, ndërsa disa vende të BE-së, si Polonia dhe vendet baltike, kanë refuzuar të pranojnë versionin gjerman, duke e cilësuar veprimin si “akt kundër interesave të Rusisë dhe jo ndaj Evropës”.
Polonia madje ka refuzuar ekstradimin e një prej të dyshuarve, duke e përshkruar atë si “patriot që ka luftuar kundër ndikimit rus”.
Nga ana tjetër, Ukraina ka mohuar çdo përfshirje, duke e quajtur raportin “një përpjekje për të njollosur një vend që po lufton për mbijetesë”.
Por hetuesit gjermanë thonë se provat materiale dhe gjurmët e ADN-së të gjetura në mjetet e përdorura gjatë operacionit përputhen me individë të lidhur me forcat speciale ukrainase.
Ky hetim i thelluar po e vendos në provë solidaritetin europian dhe perëndimor me Kievin, në një kohë kur ndihma ushtarake dhe financiare për Ukrainën është në qendër të debateve në Uashington, Berlin dhe Bruksel.
Ekspertët paralajmërojnë se, nëse akuzat ndaj Ukrainës konfirmohen zyrtarisht, raporti mund të tronditë marrëdhëniet transatlantike dhe të nxisë një valë të re skepticizmi për vazhdimin e mbështetjes ndaj saj.
Aktualisht, hetimet vazhdojnë, por sipas The Wall Street Journal, për herë të parë Gjermania është e bindur se pas shpërthimeve që shkatërruan infrastrukturën energjetike europiane nuk qëndron Rusia, por Ukraina, një përfundim që mund të ndryshojë rrjedhën e politikës europiane ndaj luftës në lindje të kontinentit. /skyweb.al
