Shqiptarët po zgjedhin gjithnjë e më shumë t’i ruajnë paratë në banka. Sipas të dhënave më të fundit të Bankës së Shqipërisë, totali i depozitave të përfshira në paranë e gjerë arriti në 1.45 trilionë lekë në fund të shtatorit, duke shënuar një rritje prej 0.9% krahasuar me gushtin.
Kjo shifër tregon jo vetëm rritje të kursimeve të qytetarëve dhe fitimeve të bizneseve, por edhe një besim më të madh në sistemin bankar, pasi më shumë para po kalojnë nga qarkullimi në depozita bankare.
Depozitat e përfshira në paranë e gjerë përfshijnë të gjitha paratë që mbahen nga individë, biznese dhe institucione, në llogari rrjedhëse, kursimi apo depozita afatgjata dhe pa afat.
Në përbërje, depozitat në lekë kanë shënuar rritjen më të fortë, 1.4% vetëm në shtator, ndërsa ato në valutë u rritën me 0.4%.
Ekspertët e lidhin këtë prirje me zhvlerësimin e euros, i cili ka nxitur një pjesë të qytetarëve të zhvendosin kursimet drejt monedhës kombëtare.
Statistikat tregojnë gjithashtu se depozitat e transferueshme në lekë, që përfshijnë fondet në llogaritë rrjedhëse të qytetarëve, kanë arritur për herë të parë në 400 miliardë lekë, ndërsa ato në valutë janë 387 miliardë lekë.
Depozitat pa afat dhe llojet e tjera të kursimeve kanë mbetur pothuajse të qëndrueshme, me një rritje të lehtë krahasuar me shtatorin e vitit të kaluar.
Në tërësi, Banka e Shqipërisë vlerëson se rritja e depozitave tregon forcim të stabilitetit financiar dhe të besimit publik në sistemin bankar. /skyweb.al
