Kryeministri Edi Rama njoftoi sot se qeveria do të nisë gjatë vitit të ardhshëm projektin kombëtar për vendosjen e matësave inteligjentë të energjisë elektrike, që synon modernizimin e sistemit të matjes dhe faturimit për të gjithë konsumatorët në vend.
Sipas Ramës, puna për vendosjen e matësave do të nisë brenda vitit 2026 dhe projekti pritet të përfundojë brenda këtij mandati qeverisës.
Ai theksoi se kjo nismë do të ketë ndikim të drejtpërdrejtë në uljen e humbjeve teknike në rrjet dhe rritjen e cilësisë së faturimit të energjisë elektrike.
“Sot kemi këtë inovacion, ndërkohë që brenda vitit 2026 do të kemi fillimin e punës për matësat e energjisë duke kaluar në sistemin e matësave inteligjentë.
Brenda këtij mandati do ta përmbyllim edhe këtë proces, që do të ulë nivelin e humbjeve teknike në rrjet dhe do të rrisë cilësinë e faturimit për çdo konsumator”, deklaroi Rama gjatë prezantimit të projektit “OSHEE Charge”, që lidhet me zhvillimin e infrastrukturës për karikimin e automjeteve elektrike.
Projekti për matësat inteligjentë shihet si një hap tjetër në modernizimin e sektorit energjetik shqiptar, pas reformave të ndërmarra në prodhim, shpërndarje dhe dixhitalizim të shërbimeve për konsumatorët. /skyweb.al
