Banka e Shqipërisë ka shprehur skepticizëm për realizimin e të ardhurave në projektbuxhetin e vitit 2026, duke paralajmëruar se rreziqet makroekonomike mbeten të larta dhe kërkojnë ndjekje të kujdesshme gjatë zbatimit të buxhetit.
Në fjalën e saj në Komisionin e Ekonomise, Zv.Guvernatorja Luljeta Minxhozi, vlerësoi në emër të BSH-së, se projeksionet fiskale janë ndërtuar mbi një kuadër supozimesh të pranueshme, por paralajmëron se ato ndodhen “në kahun e sipërm të parashikimeve”.
Projektbuxheti 2026 parashikon rritje ekonomike prej 4% dhe inflacion në nivelin 3%, me:
Të ardhura totale prej 823 miliardë lekësh, ose 29.6% të PBB-së, me rritje 6.9% nga viti 2025.
Shpenzime në nivelin 887 miliardë lekësh, ose 31.9% të PBB-së, me rritje 6.6% nga një vit më parë.
Deficit buxhetor prej 63.7 miliardë lekësh, që përfaqëson 2.3% të PBB-së, i njëjtë me nivelin e planifikuar për këtë vit.
Sipas Bankës së Shqipërisë, këto objektiva janë të arritshme, por kërkojnë analiza shtesë dhe masa korrektuese për të garantuar realizimin e planit fiskal.
“Rreziqet që shoqërojnë supozimet e skenarëve bazë mbeten relevante, ndaj devijimet potenciale kërkojnë pasurimin e analizës me skenarë alternativë dhe hartimin e masave korrigjuese,” – thekson BSH.
Institucioni qendror kërkon që në rast devijimesh, korrektimi fiskal të fokusohet në anën e shpenzimeve, duke ruajtur financimet për zërat me ndikim më të madh në ekonomi.
“Në çdo rast kur do të jetë i nevojshëm korrektimi fiskal, ai duhet të synojë respektimin e limitit të deficitit buxhetor, dhe të orientohet në kahun e shpenzimeve, duke ruajtur hapësirat për ato që ofrojnë eficiencë më të lartë,” – thuhet në vlerësimin e Bankës.
Nga ana tjetër, Banka e Shqipërisë vlerëson pozitivisht faktin që pjesa më e madhe e financimit të deficitit parashikohet nga tregu i brendshëm, përmes emetimit të titujve qeveritarë me maturitet afatgjatë.
Sipas saj, tregu financiar aktualisht ofron “prime të ulëta rreziku dhe kushte të favorshme likuiditeti”, çka pritet të lehtësojë huamarrjen e brendshme prej rreth 45 miliardë lekësh pa rritur ndjeshëm normat e interesit.
Megjithatë, Banka rekomandon që huamarrja dhe shpenzimet të shpërndahen në mënyrë të qëndrueshme gjatë vititpër të shmangur luhatjet në tregun financiar.
Në përfundim, BSH thekson se bashkëpunimi ndërinstitucional dhe monitorimi i vazhdueshëm i zhvillimeve financiare do të jenë vendimtarë për garantimin e stabilitetit fiskal dhe të tregjeve gjatë vitit të ardhshëm. /skyweb.al
