Polonia nis përgatitjen ushtarake për civilët duke ftuar qytetarë të çdo moshe nga nxënës të shkollave fillore deri te pensionistët që të marrin pjesë në trajnime vullnetare. Programi “Në Gatishmëri” përfshin katër module: njohuri bazë sigurie, mbijetesë, ndihmë e parë dhe siguri kibernetike. Sesionet zhvillohen kryesisht gjatë fundjavave dhe secili modul zgjat zakonisht një ditë.
Ministria e Mbrojtjes në Varshavë njofton se këtë vit pritet të trajnohen rreth 20 000 vetë, ndërsa brenda vitit 2026 synohet që numri të arrijë deri në 400 000. Ky është konsideruar si programi më i madh stërvitor ushtarak që Polonia ka pasur ndonjëherë, dhe motivi kryesor pas tij lidhet me shqetësimet për rritjen e tensionit me Rusinë.
Pjesëmarrësit mund të regjistrohen përmes aplikacionit qeveritar “mObywatel”, dhe mund të trajnohen si në grupe, ashtu edhe individualisht. Qeveria thotë se iniciativë ka për qëllim të forcojë rezistencën shoqërore dhe aftësitë mbrojtëse të popullsisë, jo të krijojë një shërbim ushtarak të detyruar.
Sipas zyrtarëve, zgjerimi i këtij programi vjen në një kohë kur Polonia përballet me rreziqe të reja: lufta në Ukrainë, sulmet kibernetike dhe tensionet regjionale. Me këtë strategji, shteti synon të mobilizojë qytetarët jo vetëm për gatishmëri emergjence, por edhe për të krijuar një shtresë rezerviste rezistente dhe të përgatitur. /Skyweb.al
