Të paktën 13 kompani kanë shfaqur interes për të zhvilluar objektin multi-funksional në pronën e Korporatës Shqiptare të Investimeve pranë Pallatit të Kongreseve, por vetëm pesë prej tyre kanë kaluar në fazën e dytë.
Në një listë të bërë publike Korporata vlerëson se ato që kalojnë për fazën e dytë janë kompani që plotësojnë kushtet/angazhimet dhe kriteret e kualifikimit të përcaktuara në Seksionin II, “Kushtet dhe kriteret e kualifikimit”, të Dokumentit të Kualifikimit që u publikua në fillim të shpalljes së procedurës.
Të renditura sipas rendit alfabetik pesë kompanitë janë:
- Shoqëria “Bami Holding” me nënkontraktor të specializuar “MVRDV B.V sh.p.k.” + “AEI Progetti Srl” + “IRI sh.p.k” + “Jason Bruges Studio Ltd” + “Charcoalblue International Ltd” + “Arup Engineering Trading as Ove Arup & Partners Ireland Ltd”;
- Bashkimi i Subjekteve “Concord Investment sh.p.k.” dhe “Gruppo Koni sh.p.k”, me nënkontraktor të specializuar “Perrault Architecture SASU” + “Ark. Pierre Antoine Gatier” + “Altitude 35” + “Ove Arup & Partners Ireland Ltd” + “Huesco Records” + “THARM Architects”;
- Shoqeria “Edil AL-IT” sh.p.k., me nënkontraktorë të specializuar “ARCHI-TECTONICS” + “Edil-AL” + “PNI – 2001” sh.p.k. + “ing. Lindita Pelivani”;
- Shoqëria “Gener 2” sh.p.k me nënkontraktor të specializuar “Studio GANG” + “AD-STAR shpk” + “Digi Print” + “Besart Papa” + “Rudina Papavasili”;
- Shoqëria “KLAR sh.p.k.” me nënkontraktor të specializuar “Julian Beqiri & Herzog de Meuron Basel Ltd” + “Marsela Demaj” + “Michel Desvigne (MDP)” + “Gentian Shkurti” + “SUEB INDUSTRIES sh.p.k.” + “The Space Factory Ltd”.
Lidhur me dy kompani Edil Al dhe Concord Investiment Korporata ka vendosur si kusht dorëzimin e pasqyrave financiare në formën e kërkuar sipas Formularit 2.1 – Stabiliteti Ekonomik, në Dokumentin e Kualifikimit.
Projekti për rivitalizimin e Pallatit të Kongreseve
Në njoftimin e saj fillestar Korporata nënvizonte se kushti i bazë për ofertat është që të ofrojnë jo më pak se 45 për qind të sipërfaqes totale të zhvillimit të objektit multifunksional në pronën e Korporatës pranë Pallatit të Kongreseve, Tiranë. Sipas Korporatës për objektin multifunksional në pronën e saj pranë Pallatit të Kongreseve, sipërfaqja maksimale për t’u projektuar dhe zhvilluar është 50,000 metra katrorë.
“Ky konkurrim përfshin konkursin e projektimit për dy objekte të ndryshme: Rivitalizimi i Pallatit të Kongreseve dhe objektin multifunksional (pranë Pallatit të Kongreseve). Së bashku, këto dy objekte përfaqësojnë një mundësi unike për të krijuar vepra arkitekturore me vlerë të lartë shoqërore dhe rëndësi urbane, duke përforcuar rolin e Tiranës si një qytet i kujdesit, inovacionit dhe rritjes” thuhet në dokumentet e procedurës.
Sipas Korporatës përveç ndërhyrjes tek Pallati i Kongreseve objektivi i dytë i projektimit është ndërtimi i një godine të re me përdorim të përzier, në pronën për sipërmarrje, në kufi me Pallatin e Kongreseve.
“Dy strukturat duhet të funksionojnë në mënyrë të pavarur, secila me identitetin dhe qëllimin e vet të veçantë, por duke ruajtur harmoni si në aspektin arkitektonik ashtu edhe në atë funksional. Ky zhvillim i ri duhet të pasurojë zonën përreth dhe të shërbejë si një qendër e re, e gjallë, e shumëllojshme dhe dinamike brenda kryeqytetit të Tiranës” thuhet në dokument./Monitor
