Kryeministri Edi Rama, gjatë takimit me banorët e Njësisë nr. 3 në Tiranë, sulmoi opozitën duke e cilësuar të paprecedent largimin e Partisë Demokratike nga zgjedhjet dhe mbështetjen ndaj asaj që ai i quajti “pseudo kandidatë të pavarur”.
Gjatë fjalës së tij, kryeministri deklaroi se perceptimi i qytetarëve për realitetin nuk ndikohet nga narrativat e opozitës dhe se shumica e shqiptarëve mbështesin PS-në sepse nuk shohin një alternativë të besueshme nga kampi tjetër politik.
“Shumica nuk na voton se jemi më të mirët, por se nuk ka më të mirë. Të tjerët janë kashtë e koqe që nuk i duhen dreqit,” u shpreh Rama, duke shtuar se opozita është “arratisur nga zgjedhjet” dhe se një sjellje e tillë nuk gjendet në asnjë rast të politikës evropiane.
Ai ironizoi mënyrën se si PD dhe grupet e saj të brendshme kanë zgjedhur të futen në garë, përmes kandidaturave të pavarura që, sipas tij, janë artificiale.
“Është e paprecedent që një parti që pretendon të jetë alternativa e qeverisë të fshihet pas disa pseudo të pavarurve. Madje në kryeqytet kanë nxjerrë një aktor që luan rolin e kandidatit të pavarur. Është e paparë,” tha ai.
Rama theksoi se kjo situatë e dobëson përballjen politike dhe e bën më të vështirë procesin e përmirësimit të qeverisjes.
“Kur përballë nuk ke rivalë me argumente, vizion dhe aftësi, por vetëm sharje, muskuj dhe dhunë, është e vështirë të sfidohesh e të përmirësohesh. Duhet të gjesh forcë brenda vetes,” nënvizoi kryeministri.
Takimi erdhi në kuadër të prezantimit të planeve buxhetore për vitin e ardhshëm dhe mobilizimit për fushatën lokale në Tiranë./skyweb.al
