Kryeministri Edi Rama u takua me banorët e Njësisë nr. 3 në Tiranë, ku prezantoi linjat kryesore të projektbuxhetit të vitit të ardhshëm. Ai theksoi se prioritet absolut i qeverisë për mandatin e katërt mbeten pensionistët, ndërsa paralajmëroi edhe rritje të fortë të pagave, duke përfshirë pagën minimale.
Rama deklaroi se qeveria ka siguruar tashmë kushtet financiare për një paketë mbështetëse prej 1.7 miliardë eurosh, e cila do të disbursohet gjatë mandatit të ri, duke nisur nga janari 2026. Sipas tij, mbështetja për pensionistët do të rritet çdo vit:
“Ajo që do të marrin në 2026-ën do të dyfishohet në 2027, trefishohet në 2028, katërfishohet në 2029 dhe pesëfishohet në 2030,” – u shpreh kreu i qeverisë.
Ai theksoi se kjo sforco financiare nuk do të cënojë rritjen ekonomike dhe as fondet për arsimin, shëndetësinë dhe shërbimet sociale, duke argumentuar se reformat dhe rritja ekonomike e viteve të fundit kanë krijuar hapësirën e nevojshme buxhetore.
Në fjalën e tij, Rama njoftoi edhe rritjen e pagës minimale nga 400 në 500 euro duke nisur nga janari, një masë që, sipas tij, do të zbatohet jo vetëm për sektorin publik, por për të gjithë të punësuarit në vend. Ai shtoi se deri në fund të mandatit të katërt objektivi është që paga minimale të arrijë 700 euro.
Rritja e pagës minimale, sipas kryeministrit, do të tërheqë automatikisht rritje të pagave në sektorë të tjerë. “Do të rriten pagat për mësuesit, mjekët, infermierët, policinë, ushtarakët dhe të gjithë të tjerët,” – theksoi ai, duke e cilësuar këtë një hap të rëndësishëm për standardin e jetesës.
Takimi u zhvillua në kuadër të prezantimit të projektbuxhetit të ri dhe përgatitjeve për vitin financiar që pritet të nisë në janar. /skyweb.al
