Autoriteti Kombëtar i Ushqimit ka bllokuar në pikën kufitare të Hanit të Hotit 15 kamionë të ngarkuar me misër të ardhur nga Serbia, me një peshë totale prej rreth 420 tonësh.
Ngarkesa dyshohet se përmban aflatoksinë, një nga toksinat më të rrezikshme për shëndetin e kafshëve dhe të njeriut.
Mostrat janë dërguar jo vetëm në Institutin e Sigurisë Ushqimore dhe Veterinare, por edhe në laboratorë të akredituar në Belgjikë dhe Itali, për shkak se këto laboratorë japin rezultatet shumë më shpejt se ISUV-i shqiptar.
Tashmë, analizat e para të kryera më 7 nëntor kanë konfirmuar se një sasi prej 25 tonësh misër serb rezultoi e kontaminuar me aflatoksinë. Ngarkesat e tjera janë në pritje të verifikimit, ndërsa të gjitha kanë si destinacion fermat blegtorale shqiptare.
Aflatoksina është toksinë kancerogjene e prodhuar nga myku, e cila futet në zinxhirin ushqimor sapo konsumohet nga kafshët.
Më pas ajo kalon në qumësht dhe nënprodukte të tij, pa u shpërbërë as nga proceset e pasterizimit apo përpunimit.
Organizata Botërore e Shëndetësisë e klasifikon aflatoksinën si një nga substancat më të rrezikshme për shëndetin e njeriut, me rrezik të lartë për kancer, veçanërisht atë të mëlçisë.
Sipas ekspertëve, mykotoksinat krijohen kur misri ruhet në kushte të papërshtatshme, pa tharje dhe ventilim.
Në Shqipëri, prodhimi vendas i misrit është në rënie të lirë, ndërsa fermerët detyrohen të ushqejnë bagëtinë me misër importi, kryesisht nga Serbia.
Arsyeja është e qartë: fermerët shqiptarë të drithërave janë më pak të subvencionuarit në rajon, ndërsa prodhuesi serb ka kosto më të ulëta dhe mund të shesë më lirë, duke zënë tregun vendas.
Si pasojë, lopët, delet dhe shpendët shqiptarë ushqehen me misër të importuar, i cili në këtë rast rezulton i rrezikshëm për shëndetin publik.
Ngarkesa e bllokuar prej 420 tonësh do të përfundonte në qindra ferma në të gjithë vendin.
Rasti shton edhe një herë alarmet për sigurinë ushqimore, ndërsa ngre pyetje serioze mbi varësinë e tregut blegtoral nga importet dhe dështimin e politikave bujqësore të viteve të fundit./skyweb.al
