Një takim i kryebashkiakut të Himarës, Vangjel Tavo, me përfaqësues të Fondacionit Turk Maarif ka ndezur reagime të forta në komunitetin lokal, duke hapur një debat të ri politik dhe identitar në një zonë tradicionalisht të ndjeshme.
Takimi, i prezantuar fillimisht nga vetë Tavo si një hap drejt “përmirësimit të arsimit” dhe “zgjerimit të mundësive për të rinjtë e zonës”, përfshinte propozime për hapjen e një shkolle profesionale, ngritjen e laboratorëve të rinj dhe krijimin e një qendre kursesh gjuhësore, mes tyre edhe në turqisht.
Por postimi i Tavos në rrjetet sociale u prit me ashpërsi. Qytetarë dhe aktivistë e akuzuan kryebashkiakun për “futje të turkut në Himarë” dhe për vendime të marra pa konsultim me komunitetin. Flakën e polemikës e ndezi reagimi i OMONIA-s, e cila akuzoi Tavon se po krijon terren për “shërbime shtetërore turke” në një rajon ku, sipas tyre, lëvizje të tilla rrezikojnë bashkëjetesën dhe identitetin lokal.
Në deklaratën e saj, OMONIA e cilëson veprimin “inisiativë të rrezikshme”, duke e lidhur me zhvillimet e fundit politike që çuan në largimin e kryetarit të zgjedhur Fredi Beleri dhe vendosjen e Tavos në krye të bashkisë. Sipas tyre, prania e Maarif në Himarë nuk është çështje arsimore, por tentativë për kontroll dhe ndikim në komunitet.
Pas valës së kritikave, Tavo mbylli komentet në postimet e tij dhe publikoi një sqarim të gjatë, në shqip dhe greqisht.
Ai mohoi se ekziston një plan për hapje shkolle dhe e paraqiti takimin si “informim rutinë”, duke theksuar se nuk ka marrëveshje, nënshkrime apo vendime konkrete. Tavo akuzoi OMONIA-n për “politizim të qëllimshëm” dhe për nxitje të ndasive në një kohë kur Himara, sipas tij, ka nevojë për qetësi, transparencë dhe zhvillim.
Kryebashkiaku theksoi se çdo nismë që lidhet me arsimin në Himarë do të shqyrtohet vetëm pas konsultimit me komunitetin dhe se identiteti, gjuha dhe traditat e zonës “nuk negociohen”.
Pavarësisht sqarimeve, debati në Himarë mbetet i hapur.
Zyrtarisht nuk ka vendime për projekte të reja arsimore, por reagimet tregojnë një mosbesim të thellë të komunitetit ndaj çdo iniciative që shihet si ndërhyrje e jashtme në një zonë me histori të gjatë tensionesh kulturore dhe politike. /skyweb.al
