Trafiku ajror në aeroportin e Brukselit u pezullua për pak minuta rreth orës 10:00 të mëngjesit, pasi një dron u vërejt pranë zonës së aeroportit, raportoi e përditshmja belge “La Libre”.
Sipas menaxherit të hapësirës ajrore “Skeyes”, ndalimi zgjati rreth 15 minuta dhe u vendos si masë sigurie. Autoritetet thanë se ndërprerja e shkurtër pati pak ose aspak ndikim tek udhëtarët.
Në muajt e fundit janë regjistruar disa incidente me dronë në vende të ndryshme të Evropës, shpesh afër aeroporteve apo objekteve ushtarake, përfshirë edhe një bazë ushtarake në Belgjikë.
Disa zyrtarë evropianë kanë akuzuar Rusinë për këto episode, duke i konsideruar si pjesë të një lufte hibride të lidhur me konfliktin në Ukrainë. Moska ka mohuar kategorikisht çdo përfshirje.
Si reagim, Ministria belge e Mbrojtjes ka bërë të ditur se po planifikon të forcojë kapacitetet e saj për zbulimin dhe neutralizimin e dronëve, si dhe politikat që lidhen me to. /Skyweb.al
