Greqia, Maqedonia e Veriut dhe Serbia po avancojnë një projekt të përbashkët energjetik që synon transportin e gazit natyror drejt Europës Qendrore.
Operatorët e transmetimit të gazit nga nëntë vende janë mbledhur sot në Athinë për të diskutuar zbatimin teknik të Korridorit Vertikal të Gazit.
Në qendër të projektit është përfshirja e Serbisë dhe Maqedonisë së Veriut në rrjet, ndërsa Greqia synon të forcojë rolin si porta kryesore hyrëse e gazit për Europën Juglindore.
Plani parashikon përfundimin e lidhjeve të nevojshme ndërkufitare deri në fund të vitit 2027.
Pjesë kyçe e projektit është interkoneksioni Greqi–Maqedoni e Veriut, si edhe gazsjellësi i ri Maqedoni e Veriut–Serbi.
Këto dy lidhje pritet të funksionojnë së bashku, duke krijuar një korridor të vetëm për transportin e gazit drejt tregjeve të Europës Qendrore. Serbia synon të marrë sasi gazi të lëngshëm LNG përmes Greqisë, me qëllim diversifikimin e furnizimit dhe uljen graduale të varësisë nga gazi rus.
Në fazën tjetër, projekti pritet të zgjerohet drejt Hungarisë dhe Sllovakisë.
Sipas autoriteteve greke, Korridori Vertikal nuk duhet të mbetet vetëm një aks transporti nga jugu në veri, por të kthehet në një rrjet rajonal me flukse të dyanshme.
Ndërsa Greqia, Maqedonia e Veriut dhe Serbia po ndërtojnë lidhje të reja energjetike për furnizimin e Europës, Shqipëria nuk përmendet si pjesë e këtij zgjerimi.
Kjo e lë vendin jashtë një prej projekteve më të rëndësishme rajonale për gazin, në një kohë kur Ballkani po ripozicionohet pas përpjekjeve të Europës për të ulur varësinë nga furnizimet ruse. Projekti forcon pozicionin e Greqisë si qendër rajonale energjetike dhe i jep Serbisë e Maqedonisë së Veriut rol më të madh në rrjetin e ardhshëm të gazit drejt Europës./skyweb.al
