Të ardhurat buxhetore për nëntë muajt e parë të vitit janë rritur me 6.4%, duke arritur në 562.5 miliardë lekë. Sipas Bankës së Shqipërisë, rreth 82% e rritjes mbështetet te të ardhurat nga sigurimet shoqërore dhe tatimi mbi të ardhurat personale, si rezultat i rritjes së pagave në sektorin publik dhe privat.
Banka vëren se struktura e të ardhurave nuk ka ndryshuar ndjeshëm dhe se rritja ka ardhur kryesisht nga paga më të larta.
Në të njëjtën periudhë, shpenzimet buxhetore arritën në 515.5 miliardë lekë, duke u rritur me 12.2% krahasuar me një vit më parë.
Një e treta e rritjes së shpenzimeve vjen nga skema e sigurimeve shoqërore, ndërsa shtesë të qëndrueshme kanë shënuar edhe shpenzimet për personelin si rezultat i rritjes së pagave në sektorin publik, shpenzimet për pushtetin lokal dhe ato për investime.
Pavarësisht ritmit më të lartë të shpenzimeve, buxheti rezulton në suficit prej rreth 47 miliardë lekësh ose 2.4% të PBB-së për nëntëmujorin, ndërsa vetëm në tremujorin e tretë suficiti ishte rreth 14 miliardë lekë. Megjithatë, suficiti i këtij viti është më i ulët se në të njëjtën periudhë të vitit të kaluar.
Pavarësisht suficitit, qeveria ka vijuar programin e huamarrjes. Huamarrja e brendshme është rritur me 26.4 miliardë lekë duke ndjekur strategjinë e zhvendosjes nga instrumentet afatshkurtra drejt atyre afatgjata.
Sektori bankar vijon të mbajë peshën kryesore me rreth 70% të financimit të borxhit të brendshëm. Në tregjet e huaja, huamarrja neto arriti të paktën 30 miliardë lekë, kryesisht si rezultat i Eurobondit prej 650 milionë eurosh të emetuar në shkurt.
Likuiditetet e siguruara nga borxhi i ri janë përdorur për shlyerjen e Eurobondit të vitit 2018, në vlerën 367 milionë euro, në muajin tetor. Qeveria ruan gjithashtu një nivel të lartë likuiditeti edhe në monedhën vendase si rezultat i suficiteve fiskale përgjatë periudhës. /skyweb.al
