Një ngjarje e jashtëzakonshme ka ndodhur natën mes 25 dhe 26 korrikut në aeroportin e Brindisit, ku një avion i kompanisë Turkish Airlines, që po udhëtonte nga Tunizia drejt Stambollit, u detyrua të bënte ulje emergjente për shkak të një problemi shëndetësor të një pasagjeri të mitur.
Por ajo që filloi si një emergjencë mjekësore përfundoi me zbulimin e një të mituri të zhdukur prej vitesh nga Italia.
Avioni Airbus A321-200 ishte nisur nga Tunisi në orën 23:43, por mbi hapësirën ajrore italiane, kapiteni raportoi një gjendje emergjente për shkak të një krize të fortë epileptike që goditi një 17-vjeçar.
Ai kërkoi ulje të menjëhershme dhe autoritetet italiane e drejtuan avionin në aeroportin e Brindisit, ku zbriti rreth orës 01:30 të mëngjesit.
Adoleshenti u transportua menjëherë në spitalin “Perrino” të Brindisit dhe fatmirësisht ndodhet jashtë rrezikut për jetën.
Por gjatë procedurave të identifikimit në aeroport, Policia Kufitare zbuloi se në emrin e tij ishte regjistruar prej vitesh një denoncim për zhdukje, i cili kishte sjellë edhe një urdhër për ta gjetur (“rintraccio”).
Aktualisht, i mituri ndodhet nën statusin juridik të kërkuesit të mbrojtjes ndërkombëtare, ndërsa autoritetet italiane po verifikojnë nëse kërkimet për të kanë qenë ende aktive, apo nëse ndonjë institucion kishte dështuar të njoftonte për gjetjen e tij.
Ai vijon të qëndrojë në spital për trajtim, megjithëse gjendja e tij shëndetësore nuk paraqitet e rëndë. /skyweb.al
