Strukturat vendore dhe ato të mbrojtjes civile po punojnë prej orësh në terren për të menaxhuar situatën e krijuar nga reshjet e dendura të shiut, të cilat kanë prekur pothuajse të gjithë territorin. Të gjitha qarqet raportojnë ndërhyrje për normalizimin e situatës, zhbllokim rrugësh, monitorim të lumenjve dhe mbështetje për banesat e rrezikuara.
Në qarkun Lezhë vijon puna në zonat problematike të Mamurrasit dhe Rrëshenit, ku një banesë rrezikohet nga rrëshqitja e tokës. Në Durrës, ujërat janë tërhequr në Sukth, Ishëm dhe Katund i Ri, ndërsa hidrovorët po punojnë me kapacitet të plotë. Edhe në Kukës dhe Shkodër janë pastruar akset kryesore dhe është zhbllokuar rruga Theth–Ndërlysaj, ndërsa po vijon puna në segmentet e tjera malore.
Në jug, situata është drejt stabilizimit. Në Vlorë dhe Delvinë lumenjtë janë kthyer në shtrat, ndërsa dy të moshuar u evakuuan në Finiq për shkak të ujit në banesë. Forcat e Armatosura kanë mbërritur në mbështetje me motopompa dhe mjete të specializuara. Në Bashkinë Fier prurjet e Vjosës janë rritur me intensitet, duke rritur gatishmërinë dhe vendosjen e mjeteve të tonazhit të rëndë në pikat kritike.
Edhe qarqet Elbasan, Berat, Korçë, Gjirokastër dhe Dibër raportojnë ndërhyrje të vazhdueshme, kryesisht në pastrimin e inerteve, shpërndarjen e ujërave, mbrojtjen e banesave pranë lumenjve dhe zhbllokimin e rrugëve rurale. Në disa zona, si Gramsh, Berat dhe Libohovë, janë raportuar vërshime të përrenjve dhe prani uji në parcela apo rrugë, por ekipet po punojnë për normalizimin e situatës.
Ministria e Mbrojtjes dhe Agjencia Kombëtare e Mbrojtjes Civile mbeten në monitorim të vazhdueshëm dhe në koordinim me të gjitha strukturat vendore për të garantuar reagim të shpejtë në çdo zhvillim të mëtejshëm. /skyweb.al
