Ministri i Brendshëm, Besfort Lamallari, ka komentuar aksionet e fundit të Byrosë Kombëtare të Hetimit, të zhvilluara pa përfshirjen e Policisë së Shtetit.
Në një intervistë për Report Tv, Lamallari tha se ligji i jep BKH-së të drejtën të zbatojë masat e sigurisë.
Ai theksoi se Policia e Shtetit vijon të vlerësohet nga partnerët ndërkombëtarë për bashkëpunimin dhe rezultatet në luftën kundër krimit.
“Policia e Shtetit vlerësohet nga EUROPOL dhe EUROJUST. U vlerësua bashkëpunimi që kanë me autoritetet shqiptare, përfshirë Policinë e Shtetit, e cila nga viti në vit dëshmon rritje të proaktivitetit në operacionet e koordinuara nga Europol. Si i përket bashkëpunimit me SPAK, qëllimi ynë është ta forcojmë atë, pasi është detyrim ligjor,” tha Lamallari.
I pyetur nëse arrestimet e kryera nga BKH pa Policinë e Shtetit lidhen me mungesë besimi nga ana e SPAK, ministri e mohoi një interpretim të tillë.
Sipas tij, kjo është pjesë e kompetencave që BKH ka marrë që prej reformës në drejtësi.
“Për sa kohë ligji e parashikon, që prej reformës në drejtësi, që oficerët e BKH-së jo vetëm të kenë atributet e policisë gjyqësore, por edhe të zbatojnë masat e sigurisë, unë e shoh këtë si zbatim të ligjit dhe të asaj që kemi konceptuar kur miratuam reformën në drejtësi,” u shpreh ai.
Lamallari shtoi se zbatimi i masave të sigurisë është detyrim ligjor si për oficerët e policisë gjyqësore, ashtu edhe për Policinë e Shtetit, sa herë që një masë u delegohet nga prokurori i çështjes.
