Anuela Ristani ka njoftuar largimin përfundimtar nga Bashkia e Tiranës, vetëm pak ditë pasi Erion Veliaj i hoqi nga qelia kompetencat për drejtimin e kryeqytetit.
Formalisht, Veliaj shfuqizoi delegimin e detyrave të kryetarit, ndërsa Ristani vazhdonte të mbante postin e nënkryetares. Por ajo zgjodhi të largohej plotësisht, duke mbyllur një angazhim 11-vjeçar në bashki.
“Largohem sot me mbështetjen dhe dashurinë e atyre që për mua kanë më shumë rëndësi”, shkroi Ristani, pa dhënë shpjegime për përplasjen që çoi në largimin e saj.
Kjo nuk ishte hera e parë që Veliaj tentonte t’i hiqte Ristanit drejtimin e bashkisë. Në mars 2025, ai ia kaloi kompetencat Sara Goxhajt, por urdhri u tërhoq brenda pak orësh dhe Ristani u rikthye në detyrë.
Sipas raportimeve të kohës, vendimi ishte kundërshtuar nga Edi Rama, i cili e mbështeti publikisht Ristanin dhe u shfaq përkrah saj menjëherë pas rikthimit në krye të bashkisë.
Këtë herë situata duket ndryshe. Rama personalisht nuk ka dalë në mbrojtje të Ristanit dhe nuk ka kërkuar publikisht anulimin e urdhrit të Veliajt. Kryeministria ka komentuar vetëm statusin juridik të Veliajt, duke deklaruar se ai mbetet kryetar dhe se mandati i tij duhet respektuar.
Heshtja ndaj largimit të Ristanit ngre pikëpyetje nëse vendimi është pranuar këtë herë nga Rama apo nëse në prapaskenë po përgatitet një formulë e re për drejtimin e Bashkisë së Tiranës, apo nxjerrjen nga qelia të vetë Veliajt duke stimuluar një ngërç institucional në njësinë vendore më të rendësishme në Shqipëri.
Lëvizja vjen në një moment të ndjeshëm për Veliajn. Më 15 shtator, Gjykata e Lartë pritet të rishqyrtojë masën e sigurisë ndaj tij, pasi çështja u rikthye për rigjykim nga Gjykata Kushtetuese. /skyweb.al
