Qeveria i kërkon Gjykatës Kushtetuese të pezullojë vendimin e Gjykatës së Posaçme për caktimin e masës pezullim nga detyra ndaj zëvendëskryeministres Belinda Balluku, derisa të gjykohet konflikti i kompetencës mes Këshillit të Ministrave dhe GJKKO-së.
Kërkesën, Kryeministria e ka depozituar në Gjykatën Kushtetuese këtë të premte, pasi kreu i qeverisë, Edi Rama e deklaroi më herët se do të ndiqnin këtë procedurë.
Nga kërkesa e zbardhur nga Gjykata Kushtetuese, Kryeministria argumenton se është krijuar një konflikt kompetencash midis Kryeministrit dhe Këshillit të Ministrave, nga njëra anë, dhe Gjykatës së Posaçme kundër Korrupsionit dhe Krimit të Organizuar, nga ana tjetër, lidhur me të drejtën për pezullimin e një anëtari të kabinetit qeveritar.
Më tej, qeveria i kërkon Gjykatës Kushtetuese që të shfuqizojë përfundimisht masat e caktuara nga GJKKO ndaj Ballukut.
Po ashtu, në objektin e ankimimit të Këshillit të Ministrave kërkohet edhe interpretimi i pikës 3, të nenit 103, të Kushtetutës. Pika 3 e nenit 103 të Kushtetutës thotë se Anëtarët e Këshillit të Ministrave gëzojnë imunitetin e deputetit.
Në ankimimin e qeverisë nuk kërkohet pezullimi dhe shfuqizimi i masës së sigurimit personal ndalim të daljes jashtë shtetit të caktuar ndaj Ballukut nga GJKKO. /Skyweb.al
