Banka e Shqipërisë zhvilloi sot një takim me Shoqatën Shqiptare të Bankave, duke vënë theksin tek modernizimi i sistemeve të pagesave, rritja e përdorimit të mjeteve elektronike dhe fuqizimi i bashkëpunimit mes institucioneve financiare. Diskutimet u përqendruan tek dixhitalizimi i sektorit bankar, nxitja e pagesave elektronike, integrimi i Shqipërisë në skemat ndërkufitare SEPA dhe rritja e kreditimit për bizneset dhe individët.
Guvernatori i Bankës së Shqipërisë, Gent Sejko, deklaroi se vendi ka bërë hapa të mëdhenj përpara në përdorimin e pagesave dixhitale. Në vitin 2024, numri i pagesave elektronike për frymë arriti në 23, nga vetëm 4 që ishin në vitin 2016, ndërsa përfshirja financiare është rritur në 78% nga 40% në vitin 2017. “Ky progres tregon se qytetarët po i përqafojnë gjithnjë e më shumë shërbimet moderne, ndërkohë që ulja e përdorimit të parasë fizike mbetet një prioritet kombëtar,” tha Sejko.
Një moment kyç do të jetë 7 tetori 2025, kur Shqipëria nis përdorimin e skemës SEPA për pagesat ndërkufitare, duke i bërë ato disa herë më të shpejta dhe më të lira sesa transfertat aktuale përmes bankave korrespondente. Ky hap pritet të lehtësojë ndjeshëm lidhjet financiare me Bashkimin Evropian dhe të nxisë përdorimin e kanaleve dixhitale.
Guvernatori nënvizoi se reduktimi i parasë cash sjell përfitime të shumëfishta: formalizon ekonominë, ul evazionin fiskal, rrit sigurinë në transaksione dhe ul kostot e administrimit të parasë fizike. Ai u bëri thirrje bankave të jenë më aktive në këtë drejtim, duke ofruar produkte më të thjeshta dhe më të aksesueshme për qytetarët dhe bizneset.
Në këtë linjë, qeveria shqiptare ka shpallur synimin strategjik për eliminimin e plotë të përdorimit të parasë cash deri në fund të vitit 2030. Kryeministri Edi Rama e ka cilësuar këtë objektiv si një nga reformat më të rëndësishme për formalizimin e ekonomisë dhe forcimin e shtetit ligjor.
Shoqata Shqiptare e Bankave nga ana e saj siguroi se institucionet financiare janë të përkushtuara të mbështesin këtë transformim, duke investuar në teknologji të reja, rritje të aksesit në shërbime dhe ofrim të produkteve inovative. Një vëmendje e veçantë u kushtua edhe rritjes së kreditimit për sektorin e bujqësisë, i cili konsiderohet një nga motorët kryesorë të zhvillimit ekonomik.
Takimi konfirmoi se bashkëpunimi i ngushtë mes autoriteteve dhe sektorit bankar është thelbësor për arritjen e objektivit të një ekonomie pa cash deri në vitin 2030, duke sjellë më shumë transparencë, siguri dhe zhvillim të qëndrueshëm për vendin.
