Një aparat fotografik që i përkiste Papa Françeskut u shit sot në një ankand në Vjenë për 6,5 milionë euro (7,5 milionë dollarë), pas një gare të papritur dhe të fortë ofertash.
Aparati “Leica M-A” u shit rreth 100 herë më shumë se vlera e tij e parashikuar, sipas një zëdhënësi të Ankandit të 47-të “Leitz Photographica”. Në përputhje me dëshirën e ish-kreut të Kishës Katolike, i cili u nda nga jeta në prill, të gjitha të ardhurat do të shkojnë për bamirësi. Shtëpia e ankandeve hoqi dorë edhe nga komisioni i zakonshëm.
Kompania “Leica Camera AG” ia kishte dhuruar kamerën Papa Françeskut në vitin 2024, duke e pajisur atë dhe lentet me numrin serial 5 000 000. Sipas Alexander Sedlak, drejtor menaxhues i “Leica Camera Classics” dhe “Leitz Photographica Auction”, numra të tillë të rrallë zakonisht rezervohen për pajisje speciale që u jepen figurave të njohura publike.
Identiteti i blerësit nuk u bë publik. Dy persona konkurruan për kamerën përmes telefonit.
Sedlak tha se ankandi, që zgjati rreth 10 minuta, ishte një nga betejat më emocionuese të ofertave në historinë e shtëpisë së ankandeve dhe plotësisht i denjë për këtë objekt të jashtëzakonshëm. /Skyweb.al
